10.06.2005 / 13:00

Звод правілаў клясычнага правапісу.

У канцы жніўня — пачатку верасьня 2004 году Працоўная група правяла адкрытае анкетаваньне па найбольш контравэрсійных пытаньнях — шляхам адраснага рассыланьня, а таксама праз газэту «НН» (№32 за 27 жніўня) ды інтэрнэт-сайт www.pravapis.org; вынікі анкетаваньня былі ўлічаныя ў праекце Збору, які сёлета ў сярэдзіне студзеня Працоўная група разаслала 27-мі адрасатам (мовазнаўцам, літаратарам, у зацікаўленыя інстытуцыі) на водгук. Апошні этап — унясеньне карэктываў і зацьверджаньне канчатковае рэдакцыі — скончыўся на пачатку сакавіка гэтага году.

Асноўнымі прынцыпамі дзейнасьці Працоўнае групы былі:

1) захаваць традыцыю («старыны ня рушыць, навіны ня ўводзіць») і па магчымасьці скасаваць разьбежнасьці ды ўнутраныя супярэчнасьці ў сучаснай практыцы «тарашкевіцы»;

2) спрасьціць тое, што паддаецца спрашчэньню, каб клясычны правапіс быў больш канкурэнтаздольны й вымушаў да зрухаў афіцыйны правапіс;

3) палегчыць будучае збліжэньне правапісаў.

У цяперашнім Зборы Працоўная група збольшага захавала зьмест разьвязаньняў, прапанаваных у праекце В.Вячоркі, але істотна перапрацавала фармулёўкі артаграмаў, аб’ём і разьмеркаваньне матэрыялу па разьдзелах, ілюстрацыйны матэрыял, а таксама дапоўніла дакумэнт шэрагам новых разьдзелаў і артаграмаў. Некаторыя артаграмы сфармуляваныя ўпершыню, аднак яны ня ўводзяць новых прынцыпаў, а экстрапалююць ужо існыя на матэрыял, дагэтуль не апісаны (а почасту — і неўнармаваны) з артаграфічнага гледзішча.

Правапіс чытайце ў папяровай і pdf-вэрсіі газэты "Наша Ніва"

Каб пакінуць каментар, калі ласка, актывуйце JavaScript у наладах свайго браўзеру