Прэмія прынца Астурыйскага
Ляўрэатам найпрэстыжнейшай прэміі прынца Астурыйскага, якую часам называюць «Нобэлем гішпанамоўнага сьвету», стаў партугальскі нэўрапатоляг Антоніё Дамазіё. У сераду ў Аўеда (Гішпанія) старшыня журы Хуліё Радрыгес Вілянуэва ўрачыста назваў імя партугальца (цырымонія трансьлявалася ў жывым этэры каналу «Эўраньюс»).
Антоніё Дамазіё нарадзіўся ў 1944 г. у Лісабоне. Ён зрабіў значны ўнёсак у вывучэньне хваробаў Паркінсана і Альцгеймэра, дасьледаваньне мэханізмаў страху і яго пераадоленьня. Доктар Дамазіё — ляўрэат цэлага шэрагу прэстыжных нацыянальных прэмій і сябра шматлікіх акадэмій сьвету.
Жабяня наступае
Мэлёдыя для мабільніка з мультфільму «Шалёнае жабяня» апярэдзіла у брытанскім гіт-парадзе песьні «Coldplay» і «Oasis». Гэта гук матацыкла, падкладзены пад музычную тэму з кінафільму «Паліцыянт з Бэвэрлі-Гілз». У сьвеце пашыраецца мода на рынгтоны: званкі для мабільнікаўпаводле гітовых мэлёдый. Беларускія рынгтоны ёсьць на дыску «Крамбамбулі» «0,33 FM».
АВ, Сяргей Будкін
