Прадавец касмэтыкі Оскар страціў працу. Сьцярвозная радыёвядоўца Сандра губляе рэйтынг. Але Оскар ня траціў у маркеце часу дарма і набыў некаторыя каштоўныя ўменьні й навыкі.
Ён адкрывае Школу спакушэньня. Справай гонару для прафэсара мачысцкіх навук стае мужчынаненавісьніца Сандра. Герой тэлефануе сьцерве ў этэр — і прыкідваецца закаханым на мяжы нэрвовага зрыву. Распачынаецца...
Хаўер Балагер расквеціў звыклую рамантычную камэдыю постмадэрнымі фарбамі. Маньяк-дантыст, хатняя гаспадыня-травэсты і рэкляма майткоў — усім хапае месца ў гэтым карнавале.
Вікторыя Абрыль у ролі Сандры то разьвінчаная, як лялька на шарнірах, то насьцярожаная, як кобра перад камэрай. Герой Хаўера Вэйгі, наадварот, лагодны, як сьметанковы ёгурт. Які час, такія і тыпажы. Мужчынам — пачуцьці, слабому полу — кар’ера.
Хаця пры канцы фільму нас чакае прадказальны хэпі-энд — ня верце. За фасадам патрыярхальнай рамантыкі хаваецца радыкальная перастаноўка гендэрных роляў.
Усё неўпрыкмет зьмяняецца ў гэтым гішпанскім кіно!..
▶
«Школа спакушэньня» («Escuela de seduccion»).
Гішпанія, 2004, каляровы, 110 хв.
Жанр: рамантычная камэдыя.
Адзнака: 7,5 (з 10).
