21.10.2005 / 13:00

Навіны гаспадаркі ад 21 кастрычніка

Зацукроўваемся

Сёлета айчынныя прадпрыемствы выпусьцяць 370 тысяч тон цукру, што на 5,6% больш, чым у мінулым годзе, а да 2010 г. мяркуецца нарасьціць аб’ёмы да 450 тысяч тон. Пакрысе нарошчваем запасы для цукровай вайны з Расеяй.

Бізнэс-цэнтры растуць

25 кастрычніка беларуска-кіпрскае прадпрыемства «Гіпэрком-Дэвэлапмэнт» адкрые на Нямізе бізнэс-цэнтар «Няміга-сіці». Сьледам за ім будзе адкрыты бізнэс-цэнтар «Аляксандраў пасаж» на пр.Скарыны. А ў мікрараёне Ўручча, побач зь бізнэс-цэнтрам «ХХІ ст.», зьявіцца яшчэ адзін. Будынак плошчай 43 тыс. м2 будзе мець гнутую канструкцыю і дзьве цыліндрычныя вежы. Начыньне традыцыйнае: офісы, падземная паркоўка, аўтамыйка, супэрмаркет, кавярні, крамы, більярд і цырульня.

Бэнзін падаражэў на капейку

З 12 кастрычніка ў Беларусі нязначна ўзрасьлі цэны на нафтапрадукты. Прычына — павышэньне сусьветных цэн на нафту. Літар бэнзіну А-76 на АЗС «Белнафтахім» цяпер каштуе 1150 руб. (было 1140 руб.), А-92 — 1450 руб. (1430 руб.), А-95 — 1650 руб. (1630 руб.), дызэльнае паліва — 1150 руб. (1140 руб.).

Топ – 100 калгасаў

Вучоныя інстытуту аграрнай эканомікі НАН агучылі рэйтынг 100 найлепшых сельгасарганізацый Беларусі па выніках 2004 г. Асноўным крытэрам была прыбытковасьць. На першым месцы птушкафабрыка «Дружба» (Баранавіччына). На другім — сельгаспрадпрыемства «Брылёва» (Гомельскі раён), на трэцім — УП «Саўгас-камбінат «Зара» (Мазыршчына). У «агульным заліку» перамагла Меншчына (32 гаспадаркі з 100) і заходнія вобласьці, на апошнім месцы — Віцебшчына (5).

ЗД

Каб пакінуць каментар, калі ласка, актывуйце JavaScript у наладах свайго браўзеру