Беларус заняў на дзіцячым «Еўрабачанні» 9-е месца з расейскамоўнай песняй + відэа выступаў 45

На міжнародным дзіцячым конкурсе песні «Еўрабачанне-2012»12-гадовы прадстаўнік Беларусі Ягор Жашко (Мінск) заняў дзявятае месца сярод 12 удзельнікаў.

Жашко, які адкрываў фінал «Еўрабачання», выканаў кампазіцыю «А мора-мора…», набраў 56 балаў, паведамляе БелаПАН.

Конкурс выйграла 10-гадовая ўкраінка Настасся Петрык з песняй «Неба», якая атрымала 138 балаў. Яна спявала па-ўкраінску.

Песню дзяўчынка напісала сама.

Далей ідуць прадстаўнікі Грузіі (103), Арменіі (98), Расіі (88), Бельгіі (72), Швецыі (70), Нідэрландаў (69), Ізраіля (68), Беларусі, Малдовы (52), Азербайджана (49) і Албаніі (35).

Беларускі ўдзельнік атрымаў 10 балаў ад Украіны (другое месца), па 7 — ад Азербайджана, Арменіі і Грузіі (чацвёртае), 4 — ад Расіі (сёмае), па 2 — ад Албаніі, Бельгіі і Малдовы (дзявятае), па 1 — ад Ізраіля, Швецыі і дзіцячага журы (дзесятае), 12 — у якасці бонуса (разам з астатнімі).

Гледачы Беларусі аддалі першае месца Украіне (12 балаў).

10 балаў атрымала Расія, 8 — Арменія, 7 — Швецыя, 6 — Грузія, 5 — Ізраіль, 4 — Малдова, 3 — Бельгія, 2 — Азербайджан, 1 — Нідэрланды.

«З улікам стану здароўя (перад конкурсам Ягор сур’ёзна хварэў), і ён, і уся каманда ў цэлым зрабілі ўсё, што маглі — па максімуме»,

— расказаў БелТА выкладчык па вакале беларускага канкурсанта, мастацкі кіраўнік арт-групы «Беларусы» Валерый Шмат.

«Вядома, мы ставілі на вакал, на тое, што будзе раскошнае вакальнае шоу, — працягнуў Валерый Шмат. — Але чалавек маракуе, а Бог выракуе. Тое, што залежала ад голасу, удалося не ўсё. І

вакальна Настасся Петрык была мацнейшай. Але, на мой погляд, яе нумар — не дзіцячы, у ім больш цемры, чым святла».

Беларусь выйгравала дзіцячае «Еўрабачанне» ў 2005 (Ксенія Сітнік) і 2007 (Аляксей Жыгалковіч) гадах.

У 2006 годзе было другое месца (Андрэй Кунец), у 2011-м — трэцяе (Лідзія Заблоцкая). Конкурс праводзіцца з 2003 года. Беларусь з’яўляецца яго пастаяннай удзельніцай.

СМ

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ