У Чашніцкім раёне асуджаны былы дэсантнік за спробу забойства прадстаўніка іншага роду войскаў, паведамляе БЕЛТА са спасылкай на старшага пракурора аддзела па наглядзе за законнасцю судовых пастаноў па крымінальных справах пракуратуры Віцебскай вобласці Аляксея Талкачова.
У маі гэтага года мужчына, які праходзіў службу ў Афганістане, прыехаў па справах да знаёмага ў вёсцы Дземідовічы. Завяршаўся візіт вялікім застоллем са спіртным у шырокім коле. Высветлілася, што за сталом прысутнічае прадстаўнік паветрана-дэсантных войскаў. Высвятленне натуральнага ў мужчынскай кампаніі пытання пра тое, чый род войскаў лепшы, перарасло ў бойку.
Вынік апынуўся не на карысць былога дэсантніка. Затаіўшы крыўду, ён пайшоў у дом за кухонным нажом, і параніў суперніка ў жывот.
Нават з цяжкім раненнем мужчына змог уцячы і замкнуцца ад нападніка ў доме ў знаёмага. Гэты факт, а таксама своечасова аказаная кваліфікаваная дапамога ўрачоў выратавалі яму жыццё.
"На судзе абвінавачаны сцвярджаў, што не хацеў і не здольны быў здзейсніць забойства, аднак яго дзеянні ў час канфлікту і паказанні відавочцаў сведчылі аб адваротным", — адзначыў Аляксей Талкачоў.
За замах на забойства былы дэсантнік асуджаны на сем гадоў і адзін месяц пазбаўлення волі па ч.1 арт.139 КК. Прысуд уступіў у законную сілу.
