Інавацыйныя дываны 1

Канцэрн «Беллегпрам» вызначыў пералік з 25 праектаў, што фінансуюцца за кошт выкарыстання сродкаў інавацыйнага фонду ў 2013 годзе.

Як паведамілі БелаПАН у прэс-службе канцэрна, пералік зацверджаны паводле вынікаў адкрытага конкурснага адбору, на які было пададзена 27 праектаў (работ) агульным коштам 44,4 млрд. рублёў пры планавым аб’ёме інавацыйнага фонду на 2013 год у 19,7 млрд. рублёў. Згодна з умовамі конкурсу, праекты павінны адпавядаць прыярытэтным кірункам навукова-тэхнічнай дзейнасці ў лёгкай прамысловасці, быць скіраваныя на развіццё і ўдасканаленне тэхналогій. Пры гэтым яны павінны ўключаць долевы ўдзел у фінансаванні работ арганізацыі-выканаўцы (вытворцы, спажыўца).

Сярод адабраных для фінансавання праектаў адзін з’яўляецца інавацыйным, яго падало ААТ «Віцебскія дываны». Праект прадугледжвае набыццё абсталявання і ўкараненне тэхналогіі для асваення новага канкурэнтаздольнага асартыменту тканых дывановых пакрыццяў з поліпрапіленавых нітак з разразным ворсам, што раней не выраблялася ў Беларусі. Чаканы эканамічны эфект — 600 млн. рублёў штогод. Экспарт новых дываноў прагназуецца на ўзроўні 56,3% ад аб’ёмаў вытворчасці. Фінансаванне праекта са сродкаў інавацыйнага фонду складзе 7,9 млрд. рублёў, з уласных сродкаў арганізацыі — 1,9 млрд. рублёў.

Сярод астатніх 24 праектаў, вызначаных да фінансавання, 11 — навукова-даследчыя праграмы па распрацоўцы інавацыйных тэхналогій у лёгкай прамысловасці, 7 — праекты па стварэнні новай прадукцыі ці ўдасканаленні тэхналогій, 6 — праграмы па інфармацыйным суправаджэнні інавацыйнай дзейнасці.

У ліку выканаўцаў праектаў — Віцебскі дзяржаўны тэхналагічны ўніверсітэт, Цэнтр навуковых даследаванняў лёгкай прамысловасці, Аршанскі льнокамбінат, адкрытыя акцыянерныя таварыствы «Гранітэкс», «Магатэкс», «Стужка», «Белфа», «Сукно», «Палессе», «8 Сакавіка», Лідская абутковая фабрыка і іншыя.

Спіс накіраваны на ўзгадненне ў Міністэрства эканомікі і Дзяржаўны камітэт па навуцы і тэхналогіях.

Марына Носава, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ