13.12.2012 / 14:03

За найлепшую хатку для партызанскага Дзеда Мароза даюць iPad 3 - фота 1

Музей Вялікай Айчыннай вайны абвясціў конкурс.

«Партызанскі Дзед Мароз — гэта гістарычны вобраз, — тлумачыць супрацоўніца аддзела развіцця музея ВАВ Алена Сямашка. —

У часы вайны ён быў трошкі іншым, чым цяпер: з вінтоўкай, ахоўваў лес ад фашыстаў. Пра яго пісалі вершы ў часопісах, у нумары „Мурзілкі“ за 43-год ён ёсць».

Партызанскі Дзед Мароз

і дзіўнае афармленне ягонай хаты

Партызанскі Дзед Мароз-2013

і ягоная зенітка

Узнагароджаны снегавік

Музей Вялікай Айчыннай вайны абвясціў конкурс на найлепшую хатку для партызанскага Дзеда Мароза пад назвай «Сярод соснаў і бяроз». Галоўнае патрабаванне да працаў — «відавочная прыналежнасць доміка партызанскаму Дзеду Марозу».

Пераможца атрымае ад музея ВАВ і кампаніі «Гейм Стрым» «трэці» iPad.

Пакуль выстава-конкурс не працуе — арганізатары чакаюць калі набярэцца болей за 10 працаў. Тыя, што ёсць, стаяць пакуль у працоўным кабінеце музейшчыкаў, у напаўразабраным выглядзе. Гэтыя вырабы з паперы і дрэва паказваюць, што хоць гурткі «Умелыя рукі» даўно пазнікалі, справа іх жыве.

Сустракаць наведнікаў экспазіцыі будзе ватны снегавік з кулямётнай стужкай і медалём «За адвагу».

«Мы разлічваем, што працаў будзе не менш за трыццаць, — кажа спадарыня Сямашка. — Працы прыносіць і моладзь, і дзеці, і сталыя людзі — адну з працаў прынесла жанчына 1961 года нараджэння.

Падводзіць вынікі будзем 11 студзеня, кожны з канкурсантаў мусіць прэзентаваць сваю работу — можа вершы пачытае, ці сцэнку з жыцця нашага героя раскажа».

«Нам падаецца, што ідэя наша цікавая, прынамсі, арыгінальная. — кажа Алена Сямашка. —

А некаторыя пішуць, маўляў „што яны там квасілі?“. Праект жа цікавы!»

Юрась Ускоў

0
алеся / Адказаць
14.12.2012 / 12:17
«Праект жа цікавы» Вядома цікавы, а галоўнае які нечаканы, як быццам мала эксплуатуецца ў нас тэма вайны ў дзяржаўных мэтах (замест сапраўднага клопату пра пахаванні і помнікі, праўдзівага асвятлення падзеяў). Цяпер вось казачнае дзіцячае свята мілітарызавалі... Дзед Мароз адпавядае духу часу - мірнага-ваеннага часу. ---------------------------------- А з іншага боку - хіба не годны адказ на маё «цяжкое» ля навагодняе пытанне, што паўстала разам са з'яўленнем дзіцяці: які ён наш навагодні дзед - як завецца, як выглядае, на чым ездзіць і г.д. Раней - проста было: адзін-адзіны для ўсіх - для якутаў, грузінаў, казахаў, беларусаў - «наш исконный» Дзед Мароз (у дадатак яшчэ - Снягурка ў какошніку). А цяпер - што адказваць хоць бы на такое дзіцячае пытанне: «Дзе жыве Дзед Мароз?» У Вялікім Усцюгу...ой... Белавежскай пушчы жыве - у цераме, узімку на галаве мае - шапку баярскую, летам - шапку Манамаха з саломы, на нагах - вастраносыя туфлі на ўсходні манер - сапраўды ён наш дзед? «А Дзед Мароз на аленях ездзіць?» «Ммм, гэта - замежны дзед мароз - Санта Клаўс, ён прыходзіць да дзетак з іншых краінаў». Але ж і да нас прыходзіць - у выглядзе фігурак, малюнкаў кітайскай вытворчасці, фільмаў. А ёсць яшчэ ў нас Зюзя і Святы Мікалай (слабыя пакуль канкурэнты «нашему исконному»). ---------------------------------- Хацела вось вам, шаноўная рэд., прапанаваць абмеркаванне зрабіць: ці патрэбны нам свой (свецкі) навагодні дзед, як ён мусіць выглядаць, дзе жыць і г.д.? Ды бачу, якая цікавасць да тэмы... : ( ---------------------------------- «Нашего исконного» напрыканцы 1930-х прыдумалі, а як прыжыўся... маглі б і мы прыдумаць ці дадумаць (калі гэта Зюзя альбо Св. Мікалай) нашага дзеда (з задавальненнем гляджу, як развіваецца праект «Цмок» у Budzma: спачатку лёгкі скепсіс выклікаў, а цяпер усё больш цікавы і пераканаўчы робіцца). ---------------------------------- Хаця... здаецца я знайшла: гэты - на 1-3 здымках - вельмі добры (…партызанская тэма некалькі... ды не - актуальная яшчэ, да таго ж лёгка патлумачыць - чаму яго не бачна - ён жа партызан).
Каб пакінуць каментар, калі ласка, актывуйце JavaScript у наладах свайго браўзеру