20.12.2012 / 16:17

У 1/16 фіналу Лігі Еўропы БАТЭ згуляе з любімым клубам Атацюрка абноўлена 8

Сёння ў швейцарскім Ньёне прайшло лёсаванне 1/16 фіналу Лігі Еўропы, куды з 3-га месца ў групавым турніры Лігі чэмпіёнаў выйшаў барысаўскі БАТЭ.

У 1/16 фіналу БАТЭ згуляе з турэцкім «Фенербахчэ».

Першы матч 14 лютага ў Гродне, матч у адказ — 21 лютага ў Стамбуле.

«Фенербахчэ» — славуты стамбульскі клуб, 18-разовы чэмпіён Турцыі. Цікава, што базуецца ў азіяцкай частцы Стамбула.

***

БАТЭ два гады таму, у лютым 2011 г., гуляў у 1/16 плэй-оф Лігі Еўропы, дзе па суме двух матчах саступіў ПСЖ (2:2, 0:0).

Фінал Лігі Еўропы пройдзе 15 мая 2013 г. на «Амстэрдаме-Арэне».

Нагадаем, што, а 14-й у Ньёне прайшло лёсаванне 1/8 фіналу Лігі чэмпіёнаў.

БАТЭ у групавым раўндзе Лігі чэмпіёнаў гуляў у адной групе з «Баварыяй», «Валенсіяй» і «Лілем» ды заняў 3-е месца.

***

У Стамбуле ёсць вялікая тройка каманд — «Галатасарай», «Бешыкташ» і наш будучы супернік «Фенербахчэ». Каманду яшчэ часам называюць «жоўтыя канарэйкі».
Афіцыйныя колеры каманды — жоўты і марскі.

«Фенербахчэ» васямнаццаць разоў станавіўся чэмпіёнам Турцыі па футболе. Апошні раз у 2011 годзе.

Клуб заснаваны больш за сто гадоў таму — у 1907. Хаця каранямі сыходзіць яшчэ раней, у канец XIX стагоддзя, але легалізавацца тады было складана, бо султан Турцыі выступаў супраць усялякіх зборам людзей па інтарэсах, бо лічыў гэта пагрозай манархіі.

А вось заснавальнік Турэцкай рэспублікі Мустафа Кемаль Атацюрк быў прыхільнікам якраз «Фенербахчэ».

У 1928 годзе ён падчас гульні «Галатасарая» і «Фенербахчэ» ён сядзеў побач з трыма прыхільнікамі першага клуба, і двума — «Фенербахчэ». «Нас роўная колькасць. Тры на тры, — сказаў лідар. — Бо я таксама за «Фенербахчэ».

Потым Атацюрк дапамагаў клубу, калі згарэў іх офіс.

Да 1959 «Фенербахчэ» выступаў у Стамбульскай футбольнай лізе. А пасля была заснаваная аб’яднаная турэцкая ліга, паўнавартасны чэмпіянат, першым чэмпіёнам быў якраз «Фенербахчэ».

Турэцкі, а асабліва стамбульскі футбол, вядомы крутым норавам заўзятараў. Атмасферу стадыёнаў у Турцыі прыезджыя каманды параўноўваюць з пеклам. Лёгка БАТЭ і яго фанатам яўна не будзе.
У Лізе Еўропы «Фенербахчэ» гуляў адной групе з нямецкай «Барусіяй», французскім «Марсэлем» і кіпрскім АЕЛам. З 13 пунктамі туркі занялі ў квартэце першае месца.

З вядомых футбалістаў за «Фенербахчэ» гуляюць варатар Валкан Дэмерэль, славак Міраслаў Стох, партугалец Раўль Мэйрэлеш, галандзец Дзірк Кюйт.

БАТЭ з турэцкімі клубамі пакуль не гуляў ніколі.
Што тычыць іншых айчынных клубаў, то толькі за савецкім часам мінскае «Дынама» прайшло «Генчлебірлігі» з Анкары ў Кубку Кубкаў.

За часамі незалежнасці ўсё тое ж мінскае «Дынама» прайграла «Бешыкташу», «Мінск» — «Газеантепспору», «Гомель» — «Бурсаспору».

Зміцер Панкавец, Алег Гардзіенка

0
victor / Адказаць
20.12.2012 / 16:31
добро пожаловать в ад
0
Віталь з Менску / Адказаць
20.12.2012 / 17:10
Не хапае інфармацыі пра тое, як Фенербахчэ гуляў у гэтым сезоне ў еўракубках, на якім месцы знаходзіцца ў чэмпіянаце Турцыя і як яны згулялі апошнія некалькі гульняў у чэмпіянаце. А таксама цікава было бы пералічыць зорак, якія гуляюць у клубе. І вазьміце камент у Вікторыі Паповай з СБ, што яна думае пра вынікі лёсавання :)
0
Аматар портэра / Адказаць
20.12.2012 / 17:38
Парвем на анучы.
Паказаць усе каментары/ 8 /
Каб пакінуць каментар, калі ласка, актывуйце JavaScript у наладах свайго браўзеру