Рух «За Свабоду» не будзе вылучаць сваіх кандыдатаў на выбарах у Палату прадстаўнікоў 2008 года. Такое рашэнне было прынята саветам руху «За Свабоду», пасяджэнне якога прайшло 13 ліпеня ў Мінску.
Пры гэтым савет руху аднагалосна прагаласаваў за падпісанне пагаднення аб'яднаных дэмакратычных сіл (АДС) аб прынцыпах удзелу ў палітычнай кампаніі падчас выбараў у Палату прадстаўнікоў. Былі ўхвалены тры кірункі: сумеснае ажыццяўленне кампаніі па вылучэнні прадстаўнікоў у выбарчыя камісіі ўсіх узроўняў; удзел у палітычнай кампаніі «За адкрытыя выбары»; правядзенне канферэнцыі з удзелам міжнародных арганізацый, нацыянальных парламентаў дэмакратычных краін, уладаў і дэмакратычных сіл, скіраванай на змяненне выбарчага заканадаўства, а таксама заканадаўства аб палітычных партыях і грамадскіх аб'яднаннях.
Дзейнасць руху «За Свабоду» падчас палітычнай кампаніі выбараў у Палату прадстаўнікоў будзе скіраваная на змяненне выбарчага заканадаўства, на інфармаванне грамадзян аб парушэннях іх выбарчых правоў, а таксама на мабілізацыю грамадства для абароны гэтых правоў, зазначыў падчас пасяджэння кіраўнік гомельскай фракцыі "Рэгіёны «За Свабоду» ў АДС Віктар Карняенка.
«Рух «За Свабоду» змагаецца за працэдуру, а не за ўладу. Мы хочам дамагчыся правядзення ў Беларусі свабодных і дэмакратычных выбараў», - заявіў лідэр руху, былы кандыдат у прэзідэнты Беларусі Аляксандр Мілінкевіч.
Удзельнікі сустрэчы разгледзелі таксама пытанні канчатковага фармавання выканаўчага органа руху, яго бягучую і перспектыўную дзейнасць, зацвердзілі дапоўненае прадстаўніцтва фракцыі «Рэгіёны «За Свабоду» ў Палітычным савеце АДС.
