Кіраўнік апазіцыйнай Сацыял-дэмакратычнай партыі Македоніі Бранка Црвенкоўскі заклікаў насельніцтва краіны пачаць 25 снежня кампанію грамадзянскага непадпарадкавання.

«Пачынаючы з сённяшняга дня ў нас няма ні ўрада, ні канстытуцыі, ні парламента. Ёсць толькі дыктатура па адзін бок і народ па другі»,
— сказаў палітык журналістам.

Раней пратэсты каля будынка парламента ў сталіцы Македоніі Скоп’е перараслі ў сутыкненні паміж прыхільнікамі ўрада і апазіцыяй.

Напярэдадні апазіцыйныя дэпутаты забарыкадаваліся ў будынку парламента,

патрабуючы перанесці галасаванне аб прыняцці бюджэту на наступны год з-за «залішняга дзярждоўгу», які, на іх думку, паўстане ў выпадку рэалізацыі выдаткаў, закладзеных у праект бюджэту.

Црвенкоўскі быў прэзідэнтам краіны ў 2004—2009 гг.