«Віталюр» адкрые сетку сямейных кавярняў Greenki — фоты 5

Кампанія «Віталюр» пашырае сферу дзейнасці. Апроч рознічнага гандлю і перапрацоўкі рыбы, вырашана заняцца грамадскім харчаваннем.

Сямейныя кавярні будуць працаваць пад брэндам Greenki. «Спярша аўтары праекту выношвалі назву „Зялёныя чалавечкі“. Яна падабалася дзецям, да таго ж была думка стварыць цацкі ў выглядзе смешных марсіян. Пасля пачалі імправізаваць на тэму „green — зялёны“, і гэта ў нейкім момант прывяло да слова Greenki — грынкі, яны ж грэнкі», — тлумачаць у кампаніі.

Фірмовым колерам абраны лайм.

У сярэдзіне студзеня першыя дзве кавярні Greenki адчыняцца ў новых мінскіх супермаркетах «Віталюра» — на Жыновіча, 7 і Рафіева, 56 (скрыжаванне з Бялецкага).

Для малых дзяцей у іх будзе прадугледжаны пакой з лабірынтам і іншымі забаўкамі.

***

«Віталюр» — сетка з 26 крамаў. Па адным працуе ў Бабруйску, Барысаве і Лідзе. Астатнія знаходзяцца ў Мінску.

Уласнік, выпускнік універсітэта фізкультуры Аляксандр Яцук, пачынаў з некалькіх павільёнаў з рыбай. Патрохі бізнэс разрастаўся. У сярэдзіне 2000-х ён ледзь не быў знішчаны: Яцук задраўся з кіраўніцай справамі прэзідэнта Галінай Жураўковай за прыбытковы рынак рыбы. Уласніка «Віталюра» вінавацілі ў нясплаце мытаў — ён нібыта загадаў аформіць 60 тысяч тон курынага філе як курыныя грудкі.

У выніку Яцук, які правёў у СІЗА год, быў асуджаны на 1 год і 10 месяцаў абмежавання волі. З улікам амністыі быў вызвалены ў зале суда. Яго прысуд быў названы праваабаронцамі парушэннем правоў чалавека.

Ягор Марціновіч

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ