Фрыстайліст Зміцер Дашчынскі выйграў этап Кубка свету

Беларускі фрыстайліст стаў пераможцам другога этапа Кубка свету ў лыжнай акрабатыцы, які прайшоў у канадскім Валь Сэн-Камэ.

У суперфінальной чацвёрцы Дашчынскі атрымаў ацэнку 120,24 бала і апярэдзіў канадца Трэвіса Герыца (114,61), Чжу Хана з Кітая (100,45) і аўстралійца Дэвіда Морыса (81,00).

Але ў кваліфікацыі, па выніках якой у лік фіналістаў адбіраюцца 12 найлепшых, Зміцер Дашчынскі быў толькі 8-м, а ў фінале, дзе вызначаецца чацвёрка суперфіналистаў, замкнуў квартэт (117,70). Затое ў вырашальнай стадыі медаліст двух Алімпіяд (срэбра Турына-2006 і бронза Нагана-1998) і двухразовы віцэ-чэмпіён свету (2001, 2007) не меў роўных.

У агульным заліку Кубка свету па выніках двух этапаў Дашчынскі займае 3-е месца (100 балаў), саступаючы кітайцу Цзя Цоньяну (140) і канадцу Трэвісу Герыцу (109).

Беларускі спартсмен Дзяніс Восіпаў на 9-м месцы (68 ачкоў), Аляксей Грышын — на 23-м (15), Дзмітрый Глушакоў — на 24-м (14), Станіслаў Гладчанка — на 26-м (13), Максім Гусцік — на 33-м (4) сярод 35 спартсменаў.

Наступны этап Кубка свету ў лыжнай акрабатыцы пройдзе 18 студзеня ў Лэйк-Плэсідзе (ЗША). Усяго цяперашні розыгрыш Кубка свету ўключае 7 этапаў.

БелТА

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ