У студзені — лістападзе 2012 года выручка прадпрыемстваў і арганізацый Беларусі ад рэалізацыі прадукцыі, тавараў, работ, паслуг у бягучых цэнах склала 1 квадрыльён 46,6 трыльёна рублёў. Пра гэта паведамляе Нацыянальны статыстычны камітэт.
Паводле папярэдніх звестак, за 11 месяцаў мінулага года выручка прадпрыемстваў вырасла ў параўнанні з аналагічным перыядам 2011 года ў 1,8 разу. Шмат у чым гэта ёсць вынікам трохкратнай дэвальвацыі беларускага рубля ў 2011 годзе.
З’яўленне новай катэгорыі злічэння дае магчымасць задумацца пра дэнамінацыю ў мэтах палягчэння грашовага абарачэння.
У маі 2012 кіраўнік Нацбанка Надзея Ермакова заяўляла, што асаблівай неабходнасці ў дэнамінацыі цяпер няма, так як «яшчэ ў камп’ютары змяшчаюцца ўсе нулі, грашовыя паперы з многімі нулямі яшчэ змяшчаюцца ў кашалькі». «Але ўлічваючы, што ідзе рост даходаў, ідзе рост эканомікі, будзе павялічвацца вытворчасць, лічым, што недзе ў 2013 годзе пытанне можна будзе разгледзець», — сказала Ермакова. І падкрэсліла: пры дэнамінацыі «з пункту гледжання, атрымае эканоміка даходы або яны паменшацца, нічога не адбудзецца. Гэта раўнаважкая замена выкідання нулёў як у грошах, так і ў кошце тавараў». Пазней, у верасні, Ермакова сказала, што, напэўна, у сярэдзіне 2013 года пачнём думаць аб дэнамінацыі.
Раней Аляксандр Лукашэнка заяўляў, што ў бюджэце на 2013 год «мы не прадугледжваем ніякай дэвальвацыі і тым больш дэнамінацыі».
