Міхалок і Вольскі — сярод Брэнд-персонаў 2012 года 11

Лідар гурту «Ляпіс Трубяцкой» Сяргей Міхалок і фронтмен «Крамбамбулі» Лявон Вольскі апынуліся сярод уладальнікаў тытулу «Брэнд-персона 2012 года» прафесійнага конкурсу «Брэнд года», цырымонія ўзнагароджання пераможцаў якога прайшла 25 студзеня ў Нацыянальнай бібліятэцы.

«Ніякіх „чорных спісаў“ я не бачыў, але праблемы ведаю. Гэтым рашэннем мы паказваем, што ў журы „Брэнда года“ няма цэнзуры, што тут нічога не куплена, а члены журы — гэта незалежныя людзі, у якіх ёсць сваё меркаванне», —

заявіў выканаўчы дырэктар рэкламнага агенцтва Smart Group Ogilvy Belarus Аляксандр Кулінковіч, які абяцаў перадаць узнагароды Міхалку і Вольскаму і прасіў журналістаў не блытаць яго з салістам гурту Neuro Dubel.

У ліку пераможцаў намінацыі «Брэнд-персона» таксама гендырэктар СП ЗАТ «Мілавіца» Дзмітрый Дзічкоўскі, кіраўнік кампаніі EPAM Systems Аркадзь Добкін, пісьменнікі Наталля Батракова і Андрэй Жвалеўскі, спартоўцы Аляксандра Герасіменя, Людміла Волчак, Максім Мірны і Вікторыя Азаранка, артысты Анатоль Ярмоленка, Ларыса Грыбалёва, Уладзімір Пугач, Ядвіга Паплаўская і Аляксандр Ціхановіч.

Упершыню за 12 гадоў правядзення конкурсу была заснавана намінацыя «Брэнд-лідар у сацыяльных сетках», пераможцамі якой сталі гандлёвыя маркі «Бульбашъ» (алкагольныя напоі), Mercedes-Benz (аўтамабілі і аўтамабільныя цэнтры), «Шпаркі дамавік» (паслугі сувязі, інтэрнэт), Velkom (аператары мабільнай сувязі), «МТБанк» (банкі і банкаўскія паслугі), tut.by (on-line СМІ), «Мілавіца» (адзенне), Falcone (рэстараны, кафэ), «Анега» (чыпсы).

У спажывецкай намінацыі налічваецца больш за ўсё пераможцаў — больш за сорак. Сярод іх ААТ «Элема» (верхняе жаночае адзенне), ААТ «Світанак» (дзіцячае адзенне), СТАА «Марка» (абутак), Adidas (спартыўнае адзенне), ААТ «Савушкін прадукт» (малочныя прадукты), РУП «Мінск Крышталь» (гарэлка), СП «Беліта» ТАА (касметыка), ЗАТ «Атлант» (халадзільнікі і пральныя машыны) і інш.

Гран-пры конкурсу ў прафесійнай намінацыі заваявала СЗАТ «Яліна», у намінацыі «Сацыяльна адказны брэнд» — СТАА «Мабільныя ТэлеСістэмы».

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ