Алена Брава атрымала амерыканскую выдавецкую прэмію 3

Штогод 29 студзеня амерыканскае выдавецтва Frаnс-Tіrеur USА адзначае прэміяй «Вольны стралок: Сярэбраная куля» найлепшыя кнігі выдавецкага года. Сёлета Міжнародная прэмія Frаnс-Tіrеur USА — Sіlvеr Bullеt 2013 — і адпаведны статус «Франтырор-2013» прысуджаны Алене Брава «па сукупнасці выдадзенага і ў перспектыве чаканага».

У 2012 годзе і на пачатку 2013-га ў Алены выйшлі ў ЗША на рускай мове кнігі «Каханне ў ценю казармаў Манкада» , «Спектакль у чорным тэатры» і «Менада і яе сатыры».

Рашэнне аб прысуджэнні прэміі ў дзень нараджэння Чэхава, Пастэрнака і самога выдавецтва прымае міжнародная рада, у склад якой уваходзяць пісьменнікі і славісты Марына Камі (ЗША), Сяргей Юр’енен (ЗША), Дзмітрый Бавільскі (Расія), Мікалай Бокаў (Францыя), Аляксандр Кабакоў (Расія), Марыа Корці (Італія), Элен Менегальда (Францыя), Андрэй Назараў (Данія), Міхаіл Эпштэйн (ЗША).

Алена Брава жыве ў Барысаве.

З першымі празаічнымі творамі дэбютавала ў часопісе «Маладосць». Кніга «Рай даўно перанаселены», выдадзеная ў выдавецтве «Галіяфы», сёлета стала намінантам на прэмію імя Ежы Гедройца і патрапіла ў лонг-ліст.

Аповесці «Каменданцкі час для ластавак» і «Дараванне» надрукаваны ў расійскім літаратурным часопісе «Сибирские огни», за апошнюю з іх аўтар узнагароджана расійскай літаратурнай прэміяй імя Канстанціна Сіманава і залатым медалём. Дарэчы, аповесць «Дараванне», якая перакладзена і на нямецкую мову, у бліжэйшы час павінна пабачыць свет асобнай кнігай.

lit-bel.org

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ