14.02.2013 / 09:46

Прагучала прапанова аб’яднаць беларускія Вікіпедыі афіцыйным і класічным правапісам А якой Вікіпедыяй карыстаецеся Вы? 106

16 лютага пройдзе Дзень беларускай Вікіпедыі ў Варшаве.

16 лютага 2013 года з 11:00 да 18:00 ў варшаўскім Палацы культуры і навукі (Collegium Civitas, 12 паверх) пройдзе акцыя па напісанні артыкулаў у беларускую Вікіпедыю.

«Не падабаюцца памылкі пра Беларусь у інтэрнэце? Пішы беларускую Вікіпедыю! Гэта нескладана і няцяжка. Прыходзь і паспрабуй з намі!»,
кажуць арганізатары мерапрыемства — суполкі Беларуская Нацыянальная Памяць і Таварыства Вікімедыя Польшча, а таксама сталы сябар беларусаў з Варшавы Томаш Бладынец.

Акцыя тычыцца перш за ўсё тых, хто не маюць досведу рэдагавання Вікіпедыі.

«Сустракаемся разам у адной зале, каб недасведчаныя людзі маглі наўпрост запытаць і атрымаць дапамогу.

Супольная праца, калі можаш сесці разам да камп’ютара і вырашаць праблемы з тым, хто ў гэтым разбіраецца, гэта зусім іншая справа, чым пачынаць усё самастойна дома метадам спроб і памылак»,
кажа Бладынец. Сам ён — вікіпедыст з 3-гадовым стажам, аўтар больш 1000 артыкулаў пра Беларусь па-польску.

Найбольш актыўныя ўдзельнікі атрымаюць узнагароды.

На сённяшні дзень беларуская Вікіпедыя налічвае 50 тысяч артыкулаў на «тарашкевіцы» і прыблізна столькі ж, напісаных афіцыйным правапісам
(для параўнання: у польскай частцы «вольнай энцыклапедыі» існуе каля мільёна артыкулаў). У выніку гэткага падзелу шмат працы дублюецца.
«Карыстаючыся беларускімі Вікіпедыямі, я пастаянна бачу, што адная і тая ж тэма бывае напісана іншымі словамі на „наркамаўцы“ і на „тарашкевіцы“. Значыць, двое розных людзей аддалі свой час, працу і інтэлектуальны патэнцыял, каб паасобку напісаць адное і тое ж!»,
— дзівіцца арганізатар.

[параўнайце: Менск і Мінск — НН]

Ён выступае за аб’яднанне дзвюх Вікіпедый. А вось які варыянт правапісу пакінуць — гэта задача саміх беларусаў:

«Як сябра беларускай справы, я магу толькі заклікаць беларусаў:

Спадарства, давайце спачатку прыйдзем да таго, каб большасць людзей гаварыла па-беларуску, а толькі тады будзем вырашаць, якім варыянтам арфаграфіі карыстацца».

Яшчэ адна мэта акцыі — стварыць беларускамоўную вікі-супольнасць у Польшчы.

«Жыццё вікіпедыста — гэта не толькі валанцёрская праца дома. Гэта таксама сходы, з’езды, сустрэчы, фотаэкспедыцыі — так званая „вікі-супольнасць“, якая жыве не толькі ў інтэрнеце.
Нашмат лягчэй будзе ёй сфарміравацца, калі людзі будуць асабіста ведаць адзін аднаго», кажа Томаш Бладынец.

Далучыцца да мерапрыемства можна праз Фэйсбук ці e-mail: bielarus.np@gmail.com

П.С. У адказ на гэтае мерапрыемства рэдактары беларускай класічнай Вікіпедыі (на «тарашкевіцы») прапанавалі зладзіць «Польскі тыдзень» і збіраюць спіс самых цікавых артыкулаў пра Польшчу для перакладу на беларускую мову.

Аксана Рудовіч

0
Вашкевіч Андрэй / Адказаць
14.02.2013 / 09:49
Абавязкова аб'яднаць няважна якім правапісам (я асабіста за наркамаўку), бо сам часа ад часу пішу туды і пасля смяюся, калі мае тэксты перадрукоўвае другая Вікіпедыя, наставіўшы мягкіх знакаў. Няма іншага такога еўрапейскага народа, каб меў нават дзве Вікіпедыі%)
0
дз / Адказаць
14.02.2013 / 09:54
падтрымліваю, хай будуць абодва правапісы, гэта аб'яднаньне сілаў, артыкулы стануць больш энцыклапедычнымі, а карыстацца імкнуся англійскай, бо там менш лухты.
0
Хведзя / Адказаць
14.02.2013 / 10:00
Карыстаюся абедзвюма. Але лічу, што пан Бладынец гаворыць абсалютную праўду. Вікіпедыя на тарашкевіцы марнуе нашы сілы. Толькі я не ўпэўнены, што адэпты яе пагодзяцца на спыненне яе існавання. На жаль.
Паказаць усе каментары/ 106 /
Каб пакінуць каментар, калі ласка, актывуйце JavaScript у наладах свайго браўзеру