Жанчыны з высокімі прычоскамі і блакітнымі ценямі, мужчыны ў адпрасаваных строях, вальсы і Ваенга.Напярэдадні Дня ўсіх закаханых мы наведалі вечарыну ў Доме ветэранаў і паразмаўлялі са старэйшым пакаленнем пра лебядзінае каханне, ідэальныя адносіны і ўзаемнае прыцягненне.
 |
— Вядома, каханне існуе! Зразумела, часам і непрыемнае здараецца: людзі могуць пачаць жыць разам, а потым нешта не атрымалася — і разыходзяцца. Розныя сітуацыі бываюць, але ж цяпер моладзь разумная, такога дапускаць не павінна. Трэба саступаць адзін аднаму і на дробязі не звяртаць увагі, улічваць памылкі бацькоў, глядзець у адзін бок і не папракаць адзін аднаго, не дзяўбці прэтэнзіямі. І яшчэ трэба адразу вызначыцца — вы жадаеце нармалёвае сямейнае жыццё ці ўсё ж такі выбіраеце спакусы. І ўжо ў залежнасці ад выбару распараджацца сваім жыццём і жыццём любімых людзей.
 |
— Як сказаў Пісемскі ў сваёй кнізе «Тысяча душ», каханне — гэта памкненне палоў, нічога больш. Так, безумоўна, у маладосці каханне ёсць, але гэта паняцце адноснае. 1,5 года таму я пахаваў жанчыну, з якой пражыў 9 гадоў у грамадзянскім шлюбе. Я кахаў яе, а яна мяне яшчэ больш. Яна падарыла мне лецішча, можаце сабе ўявіць? Значыць, ёсць нейкае моцнае пачуццё, каханне ці ўзаемнае прыцягненне — як яго ні назвай, сэнс усё адно не змяняецца.
 |
— Менавіта на такой вечарыне мы і пазнаёміліся, бо тут прыемна: танцы, музыка, вядучыя цудоўныя. Вольны час добра бавім — з песнямі, танцамі, у тэатр ходзім, кіно, любім весяліцца, бо жыццё — яно ж адно.
Каханне ў нас платанічнае, мы вельмі пасуем адно адному, паводле эмоцыяў, поглядаў, адчуванняў, паводле ўсіх жыццёвых здарэнняў, цяпер сябруем, дзяцей пазнаёмілі. Мы адзінокія — яе муж і мая жонка адышлі на той свет. Яна да мяне ў госці прыязджае, есці гатуе, а я ж гарманіст, граю ёй, яна спявае.
Трэба саступаць адно аднаму, своечасова папрасіць прабачэння, ісці насустрач, каб разам усё рабіць,каб не злавацца адно на аднаго, не баяцца зрабіць першы крок, у час сказаць: «Выбачай, каханая, давай пачнем усё нанова».
А наконт спакусаў… Грошы ў адносінах ролі ніякай не граюць, багацце таксама. Ні машыны, ні катэджы не патрэбныя, калі кахання няма. Каханне — гэта калі вы разам бавіце вольны час, калі ты прыходзіш з працы і цікавішся, як яе справы, як прайшоў яе дзень, як праца, калектыў, а потым вы разам вырашаеце, што на вячэру прыгатаваць і хто пойдзе ў краму. Калі ўсё робіш разам, тады пачуцці захоўваюцца, бо няма нічога лепшага за адчуванні, калі каханы чалавек побач.
Іншыя гісторыі чытайце па гэтай спасылцы.
