У расейскім Міністэрстве фінансаў заявілі, што Беларусь ня зможа атрымаць ільготнага крэдыту. Перамовы ў гэтым пытаньні прэм’ераў Беларусі і Расеі Сяргея Сідорскага і Міхаіла Фрадкова скончыліся безвынікова.
Намесьнік дырэктара Дэпартамэнту міжнародных фінансавых адносінаў расейскага Мінфіну Канстанцін Вышкоўскі сказаў Радыё Свабода, што ўрад не прыняў канчатковага рашэньня адносна крэдыту. Афіцыйны Менск просіць 1,5 мільярда даляраў.
«Неабходная яшчэ дадатковая дапрацоўка, тлумачэньні нашых ведамстваў. Бо ўчора была сустрэча прэм’ераў, і на ёй канчатковага рашэньня прынята не было».
Пасьля ўзгадненьня новых дэталяў Мінфін зноў падаць справаздачу расейскаму ўраду. Але ці атрымае афіцыйны Менск ільготны крэдыт ад Расеі? Канстанцін Вышкоўскі сказаў:
«Мы не даём ільготных крэдытаў. Расейскай практыкай гэта пакуль не прадугледжана. Умовы мусяць быць рынкавыя, а не ільготныя. Расейская Фэдэрацыя не дае пакуль ільготных крэдытаў. Так званыя крэдыты дапамогі разьвіцьцю — мы пакуль стаім толькі на пачатку шляху. Ёсьць толькі канцэпцыя дапамогі разьвіцьцю. Прэцэдэнты, якія мелі месца, у тым ліку і ў стасунках зь Беларусьсю, адносіліся толькі да крэдытаў на рынкавых умовах».
Якія ж пытаньні належыць дапрацаваць? Прадстаўнік расейскага Мінфіну патлумачыў:
«Па ўсім комплексе пытаньняў датычных эканамічнай сытуацыі ў Беларусі, зьвязаных з плацёжным балянсам. Урад хоча пераканацца і паглядзець у выніку якіх захадаў і за кошт якіх крыніцаў прыбытку гэты крэдыт будзе выплачвацца».
Меркаваны крэдыт, паводле Канстанціна Вышкоўскага, пойдзе на фінансаваньне выдаткаў беларускага бюджэту, на пакрыцьцё дэфіцыту ці часовага фінансавага разрыву. Афіцыйны Менск зможа выкарыстоўваць гэтыя сродкі на фінансаваньне бягучых выдаткаў бюджэту. У тым ліку й на плацяжы за пастаўкі расейскага газу ў Беларусь.
