З 1 жніўня консульскі аддзел пасольства Літвы ў Беларусі будзе выдаваць візы толькі па папярэднім запісе.
Нагадаем, з 28 мая па 1 ліпеня гэтага года літоўскае пасольства праводзіла эксперымент па запісе на атрыманне літоўскай візы па тэлефоне. Гэта прывяло да павелічэння чаргі тых, хто жадае атрымаць візу ў Літву без пасрэдніцтва турфірм. Апрача таго, пасольства атрымала мноства нараканняў з боку тых, хто проста не змог датэлефанавацца.
Як паведамляе дыпмісія, з 1 жніўня запіс на атрыманне візы праводзіцца ў журнале папярэдняй рэгістрацыі па панядзелках‑чацвяргах з 10.00 да 13.00. Для запісу пры сабе неабходна мець пашпарт. Талоны папярэдняй рэгістрацыі выдаюцца толькі па замежных пашпартах асабіста грамадзянам і для членаў сям’і з аднолькавым прозвішчам (для членаў сям’і з рознымі прозвішчамі дадаткова патрабуюцца дакументы, якія пацвярджаюць сваяцтва). Пасольства нагадвае, што запісы, праведзеныя па‑за тэрыторыяй пасольства, з’яўляюцца несапраўднымі.
Тыя, хто жадае выехаць у Літву, таксама могуць скарыстацца паслугамі турыстычных фірм, спіс якіх можна знайсці на сайце http://by.mfa.lt або на інфармацыйным стэндзе пасольства. Пры дыпмісіі акрэдытаваныя 40 турыстычных фірм, праз якія можна аформіць візы для паездкі ў Літву. Парадак папярэдняга запісу для арганізацый, прадпрыемстваў, турыстычных фірм, спартсменаў і мастацкіх калектываў застаецца ранейшым.
Пасольства выказвае спадзяванне, што з уводам у эксплуатацыю прыбудовы да консульскага аддзела, будаўніцтва якой плануецца закончыць у канцы жніўня 2007 года, выдача віз будзе больш зручнай для кожнага, хто жадае выехаць у Літву.
