27‑29 ліпеня ў вёсцы Церабень Пінскага раёну адбываўся моладзёвы летнік. У летніку ўзялі ўдзел актывісты з Драгічыну, Бярозы, Лунінцу, Століна, Пінску (Берасцейская вобл.), Менску і Луцку (Украіна). Летнік прысьвячаўся Дню Незалежнасці РБ, а таксама 192‑ім угодкам дэмакрата, рэвалюцыянера, стваральніка Дэмакратычнага Таварыства Франца Савіча (1815‑1845), які нарадзіўся на Піншчыне. На працягу летніка адбываліся культурна‑асьветніцкія мерапрыемсты: спрэчкі аб жыцьці Беларусі, аб гісторыі і інш.
Удзел у летніку бралі пінскія сябры моладзі БНФ, сябры Партыі БНФ, АГП, БСДП «Народная Грамада», актывісты «Руху «За Свабоду», сябра «Маладога Фронту». Завітаў на летнік таксама старшыня Рады моладзі БНФ Алесь Каліта, які прыбыў у Пінск яшчэ 26 ліпеня і пазнаёміўся з абставінамі і дзейнасьцю пінскай суполкі моладзі БНФ.
27 ліпеня ўвечары афіцыйна быў адкрыты летнік. Месца адпачынку знаходзілася ў 25 кілямэтрах ад Пінску, куды ўдзельнікі прыплылі на цеплаходзе.
28 ліпеня ў Церабень прыбылі прадстаўнікі Ўкраіны. У той жа дзень адбыліся культурніцка‑асьветніцкія і спартовыя мерапрыемствы. Старшыня Пінскай суполкі моладзі БНФ Зьміцер Кісель пазнаёміў удзельнікаў летніку з гісторыяй Пінску і традыцыямі Пінскага Палесься. Адбыліся палітычныя дэбаты на тэму «Што лепей для Беларусі: прэзыдэнт ці парлямэнт?». Кожны жадаючы праявіў сваю палітычную падрыхтоўку і аратарскі талент.
29 ліпеня да летніку далучыўся музычны гурт «Кліч», які сьпяваў традыцыйныя песьні Палесься.
