08.03.2013 / 08:58

Чаму на працэсы чыноўнікаў не ходзяць нават родныя? 3

Калі ў Мінску прэзентавалі кнігу Валера Каліноўскага пра Алеся Бяляцкага, зала была поўная. Не ўсім хапіла і месца прысесці — стаялі. Прэзентацыя кнігі самога Алеся «Асвечаныя беларушчынай» адбылася таксама ў поўнай зале. А ў верасні яшчэ было святкаванне 50-годдзя Алеся. Без юбіляра, натуральна, але з публікай.

Сёння не кожная прэзентацыя і з удзелам аўтара можа сабраць столькі людзей, а асоба Бяляцкага, які другі год сядзіць у турме, прыцягвае да сябе.

Скептык скажа, што ходзяць адны і тыя ж — сябры, знаёмыя, журналісты. Равяка, Пятровіч, Сыс... Сапраўды, але не толькі яны. Ды калі б і так, то можна хіба зайздросціць, што яны не адвярнуліся ў цяжкую хвіліну. Больш за тое, яшчэ робяць канкрэтную справу, а маглі б абмежавацца меншым.

Нехта можа такія імпрэзы палічыць за хаўтуры: маўляў, слёзы аб гаротнай долі Бяляцкага. Аптыміст бачыць праяву салідарнасці.

Такія імпрэзы — магчымасць паказаць нават не нам самім, чаго вартая салідарнасць. А тым, хто спрычыніўся да арышту Бяляцкага. Паглядзіце, колькі людзей прыходзіла на суд над праваабаронцам, яны выходзілі на акцыі ў яго падтрымку, пішуць лісты яму за краты.

А ці ёсць каму падтрымаць на судах і ў жыцці чыноўнікаў, службістаў?

Нават родныя не заўжды ходзяць на працэсы над імі. Я як рэпарцёр таму сведка.

Прыклад Бяляцкага — магчымасць задумацца, што пакіне пасля сябе вашая праца.

Павел Радына

0
Satan / Адказаць
08.03.2013 / 13:41
Facepalm
0
Filifionka / Адказаць
08.03.2013 / 15:27
Малайчына, аўтар, усё так. Наехала раз падаткавая на аднаго актывіста з мэтай абадраць ці пасадзіць. І вось падчас аднаго ягонага візыту інспэктарка прабурчэла: "Я ведаю, што вы паперы пра тое, дзе ўзялі грошы, прынясеце. Вашыя ж панапісваюць тлумачэньняў, што грошай вам пазычылі. Ох, як вы сваіх пакрываеце".
0
Базыль / Адказаць
09.03.2013 / 15:39
Калі людзі змагаліся і змагаюцца за Бяляцкага і іншых, яны не баяцца выказваць сваю салідарнасць. Таму і адчуваюць сябе больш вольнымі, няма раздваеньня асобы. Што за заганная сістэма створана!? Сістэма, дзе пануе СТРАХ. Чыноўнікі баяцца ў такой сістэме праяўляць салідарнасць, нават калі лічаць, што іхны родны ці сябра невінаваты... А раптам і цябе пацягнуць куды... А чынаўнікаў душаць па аднаму, а астатнія маўчаць, імі рухае СТРАХ.
Каб пакінуць каментар, калі ласка, актывуйце JavaScript у наладах свайго браўзеру