11.03.2013 / 16:25

У Мінскай вобласці затрымана група злодзеяў, якая крала будаўнічы інструмент

Супрацоўнікі крымінальнага вышуку УУС Мінаблвыканкама і Мінскага РУУС затрымалі групу серыйных злодзеяў, якія на працягу месяца абакралі сем прыватных дамоў у Мінскім і Дзяржынскім раёнах.

Як паведамілі ў аддзяленні інфармацыі і грамадскіх сувязяў УУС Мінаблвыканкама, з пачатку года ў Мінскі РУУС і Дзяржынскі РАУС паступалі заявы ад дачнікаў аб тым, што невядомыя абкрадалі іх дамы. У канцы лютага аператыўнікі выйшлі на след злачынцаў. Па падазрэнні ў серыі крадзяжоў былі затрыманыя пяцёра мінчан, старэйшаму з якіх 30 гадоў, а малодшаму — 20, чацвёра ўжо судзімыя за крадзяжы.

Часцей за ўсё злачынцы арудавалі ў нядаўна пабудаваных, а таксама дамах у стадыі будаўніцтва, адкуль выкрадалі, у першую чаргу, дарагія будаўнічыя інструменты.
Падазраваных цікавілі дамы са слаба ўмацаванымі дзвярыма ці нізка размешчанымі вокнамі, якія было лёгка выбіць.

Частку выкрадзенага злачынцы паспелі прадаць, астатняе будзе вернута законным уладальнікам.

У дачыненні да затрыманых распачата крымінальная справа паводле часткі 1 артыкула 205 КК (крадзеж).

Каб пакінуць каментар, калі ласка, актывуйце JavaScript у наладах свайго браўзеру