13.03.2013 / 15:36

Важны прэцэдэнт: рашэнне БАЖ адносна артыкула Пазняка. Які будзе працяг? Як Вы думаеце? Ці павінны этычныя стандарты журналістыкі распаўсюджвацца таксама на раздзелы «Меркаванні»? 38

У беларускіх СМІ завялася катэгорыя «аўтарскі блог». Такія існуюць на сайтах «Беларускі партызан», радыё «Свабода», іншых рэсурсах. Па сутнасці, гэта аналогія раздзела «Меркаванні і пошта» ў традыцыйнай прэсе. З адной розніцай: псіхалагічна яны ўспрымаюцца больш як працяг уласных блогаў, сацыяльных сетак, з іх рассунутымі межамі дазволенага. Таму нярэдка там можна прачытаць рэчы, ад якіх вушы вянуць. І так яно сыходзіла з рук: блогі і сацыяльныя сеткі пакуль практычна не падпадаюць пад старыя нормы рэгулявання.

Многія людзі і гатовыя былі б рэагаваць на публікацыі ў «аўтарскіх блогах» юрыдычна, але іх стрымлівае як адсутнасць яснага заканадаўчага рэгулявання, так і нежаданне псаваць жыццё незалежным рэсурсам.
У выніку крытыка найчасцей зводзілася да абурэння ў інтэрнэце ці на Медыякрытыцы.бай. Хоць часам у тых «блогах» пішуць такія рэчы, да палемікі з якімі і апускацца не варта.
Аднак нядаўна здарыўся важны прэцэдэнт.

Камісія па этыцы Беларускай асацыяцыі журналістаў прызнала парушэнне этычных нормаў у артыкуле Зянона Пазняка на радыё «Свабода» «Сутнасць правакацыі», дзе Пазняк абвінавачвае гісторыка Ігара Кузняцова ў спробе «сутыкнуць беларусаў і палякаў пад дыктоўку Масквы».

Прадстаўнікі БАЖ патлумачылі, што ў артыкуле ёсць сур’ёзныя абвінавачванні на адрас Кузняцова, але адсутнічаюць аргументы.

Так выйшла, што першы падобны «кейс» зачапіў палітыка Пазняка, радыё, але важнае не гэта. Важны сам прэцэдэнт: Камісія БАЖ палічыла, што этычныя стандарты журналістыкі канечне распаўюджваюцца і на аўтарскія блогі ў СМІ. Гэта прарыўнае для БелСМІ рашэнне.

Уявіце сабе, што аналагічныя звароты ў Камісію БАЖ складзе, напрыклад, Юрый Зісер у дачыненні да «Хартыі». Цікава, якімі будуць наступныя рашэнні.

Камісія па этыцы — не рэпрэсіўны орган, звяртацца ў яе не ганебна.
Уваходзяць у яе вельмі шанаваныя людзі. Негатыўнае рашэнне Камісіі БАЖ, безумоўна, непрыемнае для паважнага СМІ. Рэдактары воленс-ноленс будуць перабудоўваць сваю працу так, каб не трапіць пад асуджэнне БАЖаўскай камісіі. Гэта дае эфектыўны механізм, які палепшыць працу СМІ, але не паставіць іх пад пагрозу, не аслабіць іх, а ўзмацніць.
У гэтым кантэксце цікава, якой будзе рэакцыя радыё «Свабода», што першым «трапіла пад каня». Дырэктар «Свабоды» Аляксандр Лукашук на пытанне «Нашай Нівы», ці будзе нейкая рэакцыя на рашэнне БАЖ з боку рэдакцыі, адказаў: «Так, падзякуем за ўвагу і патлумачым сваю пазыцыю на сайце».

У сваю чаргу, БАЖу варта паклапаціцца пра ўмовы для рэгулярнай працы Камісіі па этыцы, раз ужо яна мае шанец стаць добрым механізмам расстаўлення кропак над «і» ў непазбежных для СМІ канфліктах.

P. S. Лукашэнкаўскія прапагандысцкія СМІ я не разглядаю, частка іх даўно сышла за межы дабра і зла.

Мікола Бугай

0
1 / Адказаць
13.03.2013 / 16:08
Этычныя стандарты журналістыкі павинны распаўсюджвацца на усё альбо не распаусюджвацца увогуле.
0
ЯНКА / Адказаць
13.03.2013 / 16:40
. Часьцяком сустракаў на пазьнякоўскай «Беларускай Салідарнасьці» [1], што Ігар Кузьняцоў – амаль вораг беларускага народу. Кітайцы, што панаехалі, – ворагі, якія нібы сарана могуць прайсьціся па лецішчах і паесьці ўсё, нават кару. Лябедзька – вораг, бо прывёў да ўлады самі ведаеце каго. Вячорка – вораг, бо не падтрымаў. «Говправду» – зусім ворагі, а то – нават здраднік-агент-правакатар Дзімітрыеў зноў займаецца ў іх фінансамі… Ня дзіва, што абрэвіятура «ДэмСМІ» – заўжды пішацца «Белсалідарнасьцю» ў двухкосьсі. Вось і натапырыліся пэўныя ДэмСМІ ў бок Пазьняка бажаўскай Камісіяй па этыцы. І яшчэ такім ужо даволі неэтычным мэтадам, як камэнтамі, што Пазьняку трэба «набіць пысу», «даць у лыч», «у галаву». Што ж гэта, МБ, у вашых такая дробязная помстачка Духоўнаму лідару за ягоныя «грашкі»? ___ [1] http://www.bielarus.net .
0
Антон Астаповіч / Адказаць
13.03.2013 / 17:06
Ей-ей, днямі падаю ў камісі. на "Хартыю", за вераснёўскі іх матэрыял, калі проста брудную ананімку на сумленнага чалавека надрукавалі. Паглядзім на рэакцыю.
Паказаць усе каментары/ 38 /
Каб пакінуць каментар, калі ласка, актывуйце JavaScript у наладах свайго браўзеру