Удзельнік гурту Litesound Уладзімір Каракін распавёў пра тое, як іх з братам затрымалі каля рэзідэнцыі Лукашэнкі, у раёне Заслаўскага вадасховішча.
Нагадаем, удзельнікі гурту Litesound браты Уладзімір і Дзмітрый Каракіны 12 сакавіка шукалі ў лесе месца для здымак новага кліпа, калі іх затрымалі супрацоўнікі міліцыі. Па словах Уладзіміра Каракіна, лес у раёне Заслаўскага вадасховішча яны выбралі не выпадкова:
— Мы жывем непадалёк. Ведаем, што прыгожыя дарогі знаходзяцца ў тых месцах…
Музыкі і выказаць здагадку не маглі, што тут знаходзіцца рэзідэнцыя Лукашэнкі.
— Там быў знак «Цагліна», які не распаўсюджваецца на пешаходаў. У Беларусі тысячы такіх знакаў! — кажа Уладзімір Каракін.
Калі ўдзельнікі гурту Litesound зайшлі ўглыб лесу, яны ўбачылі высокі плот і калючы дрот.
— Мы спыніліся за 150 метраў ад гэтага плота і пачалі глядзець па карце, што там знаходзіцца, — згадвае музыка.
— У гэты час нас паклікаў ахоўнік, які стаяў на вышцы. Ён папрасіў нас падысці і сказаў, што сюды ўжо едзе машына ўнутранай аховы.
Праз некалькі хвілін на месца пад’ехалі два аўтамабілі, адзін з якіх — міліцэйскі. У другой машыне знаходзіліся людзі ў цывільным, якія аддавалі ўказанні міліцыянтам.
— Гэтыя людзі не прадставіліся, — адзначыў Уладзімір Каракін. — Нам сказалі аддаць мабільныя тэлефоны. Потым яшчэ пад’ехалі людзі… Мы патлумачылі, хто мы і што выбіраем месца для здымак кліпа. Але было відаць, што нам не вераць.
Сілавікі абшукалі машыну музыкаў, знайшлі там відэакамеру, доўга яе глядзелі, хоць там, па словах Каракіна, нічога не было.
— Пры гэтым нам не давалі патэлефанаваць бацькам, якія хваляваліся. Мы з імі дамовіліся сустрэцца ў тых месцах… Дзіма літаральна маліў гэтых людзей даць патэлефанаваць!
Як распавёў Уладзімір Каракін, сілу да іх ужылі толькі адзін раз — калі забіралі тэлефоны.
— У Дзімы выхапілі мабільнік, заламалі яму рукі. Ён паспеў крыкнуць, што з намі адбываецца. Пасля гэтага мы яшчэ каля гадзіны прабылі на марозе, чакалі прыбыцця нейкага спецыяліста. Нам абсалютна не тлумачылі, што адбываецца. Цудам на гэтай лясной дарозе нас знайшлі бацькі.
Пасля іх з’яўлення паводзіны супрацоўнікаў міліцыі змяніліся. Нам ужо не трэба было чакаць незразумелага спецыяліста, і мы адразу паехалі ў аддзяленне міліцыі.Правялі там гадзіны тры. Нас апытаў чалавек у цывільным, які не прадставіўся. Да дзесяці вечара мы былі на волі. Пратаколы на нас не складалі.
Уладзімір Каракін абураны тым, што адбылося:
Крыўдна, што згубілі дзень. Дарэчы, намі займаліся начальнікі.— Гэта проста беззаконне сілавых структур! Падстаў нас затрымліваць не было.
Людзі атрымліваюць заробак за тое, што займаюцца сур’ёзнай справай, а замест гэтага яны затрымлівалі нас у лесе.Я ўжо не кажу, колькі было выдаткавана на бензін. І гэта ўсё на нашы падаткі!
