14.03.2013 / 14:18

Сакавік: час абразаць сад, прарошчваць расаду і насенку 1

Карысныя парады агароднікам і садаводам.

Сад

У сакавіку самы час агледзець сад: апрацаваць абпаленыя сонцам участкі кары, абрэзаць хворыя і ссохлыя галіны.

Месцы сонечных апёкаў і маразабойныя трэшчы апрацоўваюць наступным чынам. Пашкоджаныя ўчасткі кары выдаляюцца да здаровай тканкі. Ачышчанае месца апрацоўваецца купарвасам (1%-ным растворам меднага купарвасу або 5%-ным растворам жалезнага купарвасу) і замазваецца садовым варам.

Аптымальная пара для пабелкі ствалоў дрэваў — канец восені, як варыянт, можна зрабіць гэта у лютым. Менавіта ў другой палове лютага садовыя дрэвы атрымліваюць самыя моцныя сонечныя апёкі.

Да набухання пупышак праводзіцца абрэзка садовых дрэваў. Зразаюцца ваўчкі, сухія і хворыя галіны, асвятляецца крона.

Ствалы дрэваў варта пачысціць металічнай шчоткай — пад ссохлымі фрагментамі кары зімуюць шкоднікі, там жа захоўваюцца споры хваробатворных грыбоў. Перад гэтым вакол става трэба пакласці посцілку. Зрэзаныя сухія і хворыя галіны і кавалкі кары трэба знішчыць.

Гарод

У сакавіку высейваюць на расаду насенне памідораў, капусты і цыбулі-парэй.

У канцы месяца можна пачынаць закладваць раннюю бульбу на прарошчванне. Ідэальны варыянт — прарошчванне на вольным паветры. Калі ж надвор’е не дазваляе вынесці насенку на вуліцу, рассыпце яе ў асветленым памяшканні.

Каб насенка прарасла хутчэй і парадавала вас вялікім ураджаем, апрацуйце яе сумессю сродкаў ад узбуджальнікаў хваробаў і мікраэлементаў (бор, магній, цынк). Можна таксама пасыпаць насенне драўняным попелам і медным купарвасам.

Дзе набыць насенку — чытайце тут.

Кветнік

Вопытныя кветкаводы раяць у сярэдзіне сакавіка пачынаць вырошчваць вяргіні, гладыёлусы, бягоніі, а напрыканцы месяца брацца за пасеў астраў, аксамітак, настурак.

Пасля з'яўлення ўсходаў ёмістасці з сеянцамі варта перанесці на падваконні.

Сямён Печанко

0
Лявон / Адказаць
11.03.2016 / 23:26
Дзякуй за параду!
Каб пакінуць каментар, калі ласка, актывуйце JavaScript у наладах свайго браўзеру