17 сакавіка 2012 г. стала вядома, што асуджаныя за тэракт у мінскім метро Дзмітрый Канавалаў і Уладзіслаў Кавалёў расстраляныя. Іх родныя атрымалі ў гэты дзень адпаведныя рашэнні Вярхонага суда.

Апошняе спатканне Любові Кавалёвай з асуджаным на пакаранне смерцю сынам адбылося ў следчым ізалятары (СІЗА) КДБ 11 сакавіка 2012 года. Маці пакаранага і праваабаронцы лічаць, што Уладзіслаў быў пакараны ў перыяд з 12 па 15 сакавіка. Дакладнай інфармацыі па гэтым пытанні няма. 14 сакавіка стала вядома, што Лукашэнка адмовіўся іх памілаваць.

Любоў Кавалёва працягвае змагацца за тое, каб вярнуць цела сына.

На прэс-канферэнцыі, што прайшла на гэтым тыдні яна падпісала заявы на адрас Дэпартамента выканання пакаранняў МУС, КДБ і старшыні Вярхоўнага суда з просьбай паведаміць, які орган выканаў смяротны прысуд у дачыненні да яе сына. Яна таксама патрабуе раскрыць месца пахавання Кавалёва. Што да сям’і другога пакаранага па справе аб тэрарызме, Дзмітрыя Канавалава, то, паводле праваабаронцы Паўла Левінава, яна па-ранейшаму пазбягае якіх-небудзь кантактаў.

***

у выніку выбуху на станцыі метро «Кастрычніцкая» ў Мінску 11 красавіка 2011 года загінулі 15 чалавек, 315 — пацярпелі. Ва ўчыненні тэракту быў абвінавачаны Дзмітрый Канавалаў, Уладзіслава Кавалёва прызналі яго саўдзельнікам. Абодва былі жыхарамі Віцебска. 30 лістапада 2011 года Вярхоўны суд прыгаварыў маладых людзей да вышэйшай меры пакарання. Канавалаў прызнаў сваю віну ў судзе і па памілаванне да прэзідэнта не звяртаўся, Кавалёў такое прашэнне падаў.