18.03.2013 / 17:06

Хто атрымае прэмію «Дэбют»? 13

21 сакавіка. Галерэя «Ў» (пр.Незалежнасці, 37а).

У чацвер стануць вядомыя пераможцы прэміі «Дэбют» імя Максіма Багдановіча. Прэмія заснаваная Беларускім ПЭН-цэнтрам і Саюзам беларускіх пісьменнікаў і ўручаецца найлепшым аўтарам, якія выдалі першую кнігу. Прэмія ўручаецца ў трох намінацыях: проза, паэзія, пераклад.

Шорт-ліст намінантаў сёлета выглядае наступным чынам:

Паэзія:

Андрэй Адамовіч. Вершы Андрэя Адамовіча выходзілі ў «Нашай Ніве», траплялі ў польскія зборнікі сучаснай беларускай паэзіі і друкаваліся ў часопісе «Дзеяслоў».

Наста Манцэвіч. Яе кніга «Птушкі», у якой аўтарка сярод іншага закранула тэму аднаполага кахання, выклікала літаратурны скандал і ўвогуле стала адной з самых дыскусійных кніг 2012 года.

Кацярына Макарэвіч. Аўтарка кнігі «Соль і неспакой» у 2010 годзе стала фіналісткай конкурса маладых літаратараў імя Ларысы Геніюш.

Проза:

Юлія Шарова. Яе раман «Don Giovanni або Памілаваны свавольнік» выйшаў у электронным выглядзе, і таксама выклікаў шэраг дыскусій. Што цікава, «Дон Джавані» мусіў выйсці яшчэ сем год таму.

Ксенія Шталянкова. Раман 16-гадовай Ксеніі Шталянковай «Адваротны бок люстра» таксама стаўся яскравай падзеяй у 2012 годзе — прынамсі, якасныя раманы для падлеткаў у беларускай літаратуры сустракаюцца рэдка.

Андрэй Пакроўскі. Кніга «Як я перастаў верыць у Дзеда Мароза» трапіла ў лонг-ліст прэміі Гедройца, што для дэбютнай кнігі зусім неблагі вынік. Да таго ж Пакроўскі, абапіраючыся на досвед Сяргея Жадана, імкнецца не адставаць ад сучаснага літаратурнага працэсу.

Пераклад

Ганна Янкута. «Калядны Харал» Чарлза Дыкенса з’явіўся ў сярэдзіне снежня — у рэшце рэшт, найпапулярнейшы калядны твор займеў беларускую версію.

Павел Рааго. Жо Лангерава «Калісьці ў Браціславе. Маё жыццё з Оскарам Л." Раман ахопліваю цэлую эпоху ў гісторыі Славакіі — ад перадваенных часоў да сталінізацыі.

Святлана Богуш. Рудольф Слобада «Розум». Знакавы для славацкай літаратуры раман таксама выйшаў па-беларуску.

Апроч намінантаў у імпрэзе возьмуць удзел Лявон Баршчэўскі, Уладзімір Арлоў, Павел Бераговіч, Генадзь Бураўкін, Уладзімір Някляеў, Барыс Пятровіч, Андрэй Хадановіч, Валянцін Акудовіч і гурт «Рэха».

Уваход вольны. Пачатак, а 19-й.

Хочаш падзяліцца важнай інфармацыяй ананімна і канфідэнцыйна?

ЮУ

0
Букмекер / Адказаць
18.03.2013 / 17:25
Адамовiч, Шарова, Янкута
0
голас з цемры / Адказаць
18.03.2013 / 18:07
Сярод паэтаў дык і выбіраць няма каго. У Макарэвіч яшчэ больш-менш прысутнасць таленту прасочваецца, астатнія - адстой! А ў перакладах - Янкута, тут і да варажбіткі не хадзі, са старту ўсё ясна. Наста Манцэвіч, яе кніга «Птушкі» выклікала літаратурны скандал - ну дык можа варта прэміі за скандальнасць даваць у такім выпадку? Пры чым тут паэзія, тым больш, калі яе там няма?
0
2 голас з цемры / Адказаць
18.03.2013 / 18:14
Чытайце Цётку!
Паказаць усе каментары/ 13 /
Каб пакінуць каментар, калі ласка, актывуйце JavaScript у наладах свайго браўзеру