Беларускіх футбольных фанатаў абавяжуць дубляваць англамоўныя банеры на расейскую 7

У рэгламенце футбольнага чэмпіянату Беларусі можа з`явіцца патрабаванне да заўзятараў дубляваць англамоўныя банеры на расейскай мове.

Такую выснову можна зрабіць з выступлення намесніка начальніка ўпраўлення аховы правапарадку і прафілактыкі УУС Гомельскага аблвыканкама Сяргея Шапецькі 19 сакавіка на перадсезоннай нарадзе па пытаннях бяспекі правядзення футбольных матчаў, у якой узялі ўдзел прадстаўнікі МУС, КДБ, пракуратуры, МНС, футбольныя заўзятары і адказныя работнікі ФК «Гомель».

Паводле звестак прэс-службы клуба, Шапецька зачытаў прапанаваныя новаўвядзенні ў рэгламенце па частцы бяспекі, якія федэрацыя футбола прадставіла на абмеркаванне міліцыі. «Акрамя ўжо знаёмых забарон накшталт знаходжання ў нецвярозым выглядзе ці недапушчальнасці праявы расавай дыскрымінацыі

з`явіўся пункт пра неабходнасць дубляваць англійскія словы расейскім перакладам на банерах і расцяжках і іншыя навіны. Як адзначыў Шапецька, абмеркаванне гэтай часткі рэгламента сумесна з федэрацыяй запланавана на найбліжэйшы час», — адзначаецца ў прэс-рэлізе.

Паводле меркавання прадстаўніка УУС, яшчэ не позна абнавіць рэестр банераў і атрыбутыкі, каб «пазбегнуць цяжкасцяў непасрэдна перад матчамі».

Шапецька адрэагаваў на адкрыты ліст рэдакцыі сайта пра аматараў Belultras.by да кіраўніцтва БФФ, дзе ўтрымліваліся крытычныя выказванні ў адрас міліцыі. Паводле яго слоў, паслабленняў у плане агляду не будзе, бо практыка паказала, што з групы актыўных фанатаў заўсёды знойдуцца некалькі, якія паспрабуюць пранесці забароненыя прадметы.

Акрамя таго, захаваецца і відэаздымка, таму што «грамадзянам, якія не парушаюць грамадскі парадак, баяцца, што іх здымуць на камеру ці перапішуць даныя, няма сэнсу». Працягнецца і ўдзел супрацоўнікаў АМАПа ў аглядзе заўзятараў на тых сектарах, дзе, на думку міліцыі, спатрэбіцца павышаная ўвага.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ