21.03.2013 / 10:44

«Я помню ўсё». Выйшла кніга творчай спадчыны Зоські Верас 5

Зоська Верас. 1978 год. Фота Сяргея Панізніка.

У кніжнай серыі «Гарадзенская Бібліятэка» выйшла кніга «Зоська Верас. Я помню ўсё». Гэта першае выданне творчай спадчыны Зоські Верас.

У кнізе друкуюцца ўспаміны Зоські Верас (Людвікі Сівіцкай; 1892–1991), яе прыватная карэспандэнцыя, фотаздымкі. Упершыню апублікаваныя 367 лістоў, датаваныя 1967—1989 гг. Гэта — красамоўная гісторыя Беларусі і Гародні, перажытая пісьменніцай, мемуарысткай, публіцысткай, лексікографам, перакладчыцай, асветніцай і грамадскай дзеячкай. Лісты і ўспаміны сабраў, апрацаваў і ўклаў Міхась Скобла.

Першая прэзентацыя кнігі «Зоська Верас. Я помню ўсё» адбудзецца ў Гродне 23 сакавіка ў часе Гарадзенскай Дыктоўкі-2013. Пачатак а 12.00 (Будзёнага, 48а, зала ва ўнутраным дворыку).

Адмысловымі госцьмі прэзентацыі будуць: укладальнік кнігі Міхась Скобла, літаратар і крытык Анатоль Сідарэвіч, паэтка Данута Бічэль, краязнаўца Алесь Госцеў, прафесар Аляксей Пяткевіч, кіраўнік «Паходні» Мікола Таранда.

***

«Зоська Верас. Я помню ўсё» — гэта 21-я кніга кніжнай серыі «Гарадзенская бібліятэка», — кніжнай серыі, заснаванай у 2006 годзе з мэтай дакументацыі і прасоўвання культурнага і гістарычнага даробку гарадзенцаў, а таксама папулярызацыі ведаў пра сярэднявечную, навачасную, міжваенную і паваенную гісторыю Гародні як істотнага элемента еўрапейскай спадчыны.

ПМ

0
Eugen Zdankievic / Адказаць
31.07.2013 / 22:38
>«Зоська Верас. Я помню ўсё» - першае выданне творчай спадчыны Зоські Верас. А што лічыць творчай спадчынай? Вершаў Зоські Верас у кнізе няма, а ў 80-х выдавецтва "Юнацтва" выпускала сякі-такі зборнік "Каласкі". А дзе шукаць іншую спадчыну Зоські Верас - розныя пчалярскія, батанічныя слоўнікі? У кнізе таксама гэтага няма. Але тое, што гэта чарговы магутны том эпісталярна-мэмуарнага жанру, факт. Больш падрабязна пра кнігу чытайце тут http://mbnf.info/index.php?option=com_content&view=article&id=1321:2013-07-31-09-29-31&catid=4:all-news
0
Melaman / Адказаць
01.08.2013 / 08:35
Так, магутняк кніга, нават музыка беларуская згадваецца: Віктар Шалкевіч, Данчык. А савецкі камунізм увогуле ў поўнай сваёй "красе".
0
Eugen Zdankievic / Адказаць
01.08.2013 / 23:39
Магутняк то магутны, але вершаў Зоські Верас маглі б крыху больш уключыць у такі том. Мо ў каго ёсць згаданы тут зборнік "Каласкі"?
Паказаць усе каментары/ 5 /
Каб пакінуць каментар, калі ласка, актывуйце JavaScript у наладах свайго браўзеру