Беларусь выплаціла МВФ $82,2 мільёна па асноўным доўгу крэдыту
Сёлета - пік выплат па крэдыту.
Беларусь сёння ў мэтах выканання сваіх абавязацельстваў па крэдыту стэнд-бай Міжнароднага валютнага фонду ажыццявіла пагашэнне асноўнага доўгу ў памеры $82,2 млн.
Гэта ўжо восьмае пагашэнне асноўнага доўгу па крэдыту стэнд-бай МВФ. Пры гэтым пяць з іх на агульную суму 303,5 млн. СДР (эквівалент $465,2 млн.) адбыліся ў 2012 годзе. Такім чынам, у бягучым годзе рэспубліка ажыццявіла пагашэнне асноўнага доўгу па крэдыту МВФ ужо трэці раз. Папярэдні раз, 23 студзеня, Беларусь выплаціла 54,7 млн. СДР, што было эквівалентна $84,1 млн.
У 2011 годзе Беларусь ажыццяўляла толькі працэнтныя плацяжы па крэдыту стэнд-бай — на агульную суму 54,7 млн. СДР.
Пік выплат па крэдыту прыпадае на 2013 год.
У канцы 2008 года беларускія ўлады звярнуліся да кіраўніцтва Міжнароднага валютнага фонду з просьбай аб заключэнні крэдытнага пагаднення стэнд-бай. У выніку ўзгаднення Беларуссю і МВФ параметраў названага пагаднення Савет выканаўчых дырэктараў фонду 12 студзеня 2009 года адобрыў праграму тэрмінам на 15 месяцаў і выдзяленне Беларусі фінансавых рэсурсаў у аб’ёме каля $2,46 млрд. Па выніках першага агляду былі скарэкціраваны і адобраны абодвума бакамі новыя параметры праграмы і ў адпаведнасці з запытам беларускага боку павялічаны агульны аб’ём фінансавання да $3,46 млрд. Рэалізацыя праграмы завяршылася ў красавіку 2010 года, што дало магчымасць забяспечыць дадатную дынаміку па шэрагу пазіцый у эканоміцы і грашова-крэдытнай сферы Беларусі.
