Акцёр Уіл Сміт патлумачыў сваю адмову ад ролі Джанга ў фільме Квенціна Таранціна «Джанга вызвалены» ў інтэрв'ю часопісу Entertainment Weekly.
Сміт вырашыў не выконваць ролю чарнаскурага раба, бо не палічыў яго галоўным персанажам карціны. На думку акцёра, галоўным героем фільма з'яўляецца «паляўнічы на галовы» ў выкананні Крыстафа Вальца.
Акцёр распавёў, што нават прасіў Квенціна Таранціна памяняць сцэнар і пашырыць ролю Джанга. «Менавіта я павінен забіць дрэннага хлопца!» - аргументаваў Сміт, аднак рэжысёр адмовіўся мяняць пад яго сцэнар.
Пры гэтым Сміт выказаўся пра карціну добразычліва: «Гэта бліскучы фільм. Проста ён не для мяне».
***
Вестэрн «Джанга вызвалены» выйшаў у снежні 2012 года. У ім распавядаецца пра чарнаскурага амерыканскага раба Джанга, якога выкупляе «паляўнічы на галовы» і праціўнік рабаўладання Кінг Шульц. Роля Джанга дасталася Джэймі Фоксу.
У 2013 годзе «Джанга вызвалены» атрымаў прэмію Амерыканскай кінаакадэміі за найлепшы сцэнар, а выканаўца ролі «паляўнічага» Крыстаф Вальц атрымаў узнагароду за найлепшую ролю другога плана.