У межах ЭППВ (Экалагічнае партнёрства паўночнага вымярэння) Швецыя сёння праз ЕБРР (Еўрапейскі банк рэканструкцыі і развіцця) і ПІБ (Паўночны інвестыцыйны банк) падтрымлівае інвестыцыі ў экалагічныя праекты ў пяці гарадах Беларусі: Гродне, Віцебску, Баранавічах, Брэсце і Слоніме.
Падтрымка накіроўваецца праз шведскую дзяржаўную ўстанову СІДА і складае 13,6 млн еўра, якія ўключаюць у тым ліку незваротную субсідыю ў суме 3,5 млн еўра ў Гродне і 2,7 млн еўра ў Віцебску на ачышчальныя збудаванні, а таксама незваротную субсідыю ў суме 2,8 млн еўра на будаўніцтва біягазавых установак у Баранавічах і Слоніме. Агульны аб’ём інвестыцый у Гродне, Віцебску і Брэсце складае 65 млн еўра, а таксама ўключае незваротную субсідыю ў памеры 6 млн еўра ад ЭППВ і крэдыт у памеры 33,5 млн еўра ад ЕБРР, што дасць магчымасць мадэрнізаваць водаачышчальныя сістэмы гэтых гарадоў згодна з патрабаваннямі ЕС і HELCOM.
У цырымоніі падпісання, якая адбылася сёння ў Мінску, узяў удзел кіраўнік працоўнай групы Юакім Ваэрн, прадстаўнік Дэпартамента Усходняй Еўропы і Цэнтральнай Азіі Міністэрства замежных справаў Швецыі. «Шведская падтрымка паказвае, наколькі важнымі мы лічым гэтыя праекты для навакольнага асяроддзя, і не толькі для ўсяго рэгіёну Балтыйскага мора, — заявіў ён. — Развіццё ўстойлівага водазабеспячэння і ачысткі сцёкавых водаў у першую чаргу адпавядае інтарэсам насельніцтва гэтых пяці гарадоў Беларусі. Сённяшняе падпісанне дамовы аб незваротнай субсідыі з’яўляецца яшчэ адным крокам у напрамку да змены сітуацыі праз паляпшэнне стану навакольнага асяроддзя як у Беларусі, так і ў Балтыйскім рэгіёне. Мы, натуральна, чакаем хуткай рэалізацыі гэтых праектаў і працягу эфектыўнага супрацоўніцтва з нашымі партнёрамі ў Беларусі, іншымі донарамі і міжнароднымі арганізацыямі».
