Былога прэзыдэнта Румыніі вінавацяць у жорсткім разгоне студэнцкай дэманстрацыі 17 гадоў таму.
Сьледзтва працягвалася 2 гады. На падставе паказаньняў сьведкаў і рассакрэчаных урадавых дакумэнтаў пракуроры даказалі, што былы прэзыдэнт выдаў загад прывесьці шахцёраў у сталіцу менавіта з мэтай «ачышчэньня» Унівэрсытэцкай плошчы ад дэманстрантаў.
Пратэстуючыя некалькі тыдняў пад унівэрсытэтам студэнты й інтэлектуалы дамагаліся адстаўкі ўраду, у які ўвайшлі, між іншага, былыя супрацоўнікі дыктатара Нікалае Чаўшэску. У сталіцу прыехала 5 тыс. гарнякоў, якія «наводзячы парадак», забілі 7 чалавек, некалькі дзясяткаў паранілі й зьнішчылі офісы апазыцыйных газэт.
Працэс былога прэзыдэнта, які каардынаваў акцыю, пачнецца ў палове верасьня ў Вышэйшым судзе Румыніі. Іён Іліеску, абвінавачаны ў закліках да зьдзяйсьненьня забойства, не прызнаецца ў віне.
