06.04.2013 / 15:40

Туфлі мадэльныя за 50 тысяч? — «Калі ласка!» 5

У цэнтры Мінска адкрылася першая ў краіне дабрачынная крама.

Калі вы даўно марылі разгрузіць шафу і паліцы ад непатрэбных рэчаў (асабліва пасля чарговага візіту ў акропалісы-озасы), вам — у «Калі ласка!». Заадно дапаможаце бяздомнікам, сіротам ды бедным сем’ям.

«Калі ласка» — першая ў нашай краіне дабрачынная крама, ці чарыцішоп, па-хіпстарскі.

Як гэта працуе? Вы аддаяце ў дар краме непатрэбныя рэчы — вопратку, кнігі, посуд (поўны спіс тут). А стваральніцы «Калі ласка» — Алеся Пчолка, Ганна Леванкова і Вольга Качура — перабяруць іх, дэзінфекуюць і перададуць дабрачынным арганізацыям.

Частка рэчаў застанецца ў краме. Грошы, атрыманыя ад іх продажу, пакрыюць выдаткі на арэнду, падаткі, «камуналку» і ў перспектыве — заробак прадаўца.

Пры гэтым максімальная цана любой рэчы ў краме не перавысіць 200 тысяч. У гэтым мы пераканаліся на ўласныя вочы: амаль новы мужчынскі пінжак, туфлі на шпільках — усё па 50 тысяч! Налятай — разбірай. Як бонус — адчуванне, што прыносіш карысць грамадству.

Зараз уся праца вядзецца на валанцёрскіх пачатках. «Дапамагаць іншым — гэта натуральна», кажа адна з ўдзельніц праекту, Ганна Леванкова.

Зразумела, цягнуць усю працу тром маладым дзяўчынам няпроста. Таму прапановы з боку патэнцыйных валанцёраў вітаюцца. Асабліва патрэбна дапамога тых, хто можа на аўто адвесці рэчы ў дзіцячыя дамы ды іншыя арганізацыі.

Мы завіталі ў «Калі ласка» двойчы: за дзень да адкрыцця і ў першы дзень працы. Трэба сказаць, што знайці краму няпроста, хоць месціцца яна ў самым цэнтры горада (карта тут).

Мінуўшы будку з злым сабакам (праўда, на зваротнай дарозе ён ужо не брахаў), упіраемся ў прамысловы будынак. Знаходзім апошні пад’езд. Падымаемся па лесвіцы з абшарпанымі сценамі на другі паверх. Як высветлілася, «Калі ласка» знаходзіцца ў так званым «крэатыўным кластары ме100» («Месца»). Гэта, бадай што, райскі куток для сталічных хіпстараў.

Як выглядае крама ўнутры і што тут тварылася ў першыя гадзіны працы, калі яблыку не было дзе ўпасці ад наведнікаў, фатографаў і журналістаў (у тым ліку цэнтральнага тэлебачання), глядзіце на відэа:

Адрас крамы «Калі ласка»: г. Мінск, пр. Незалежнасці, 58 корп.6, 2 паверх. Сайт — http://kalilaska.org

Аксана Рудовіч, Ірына Арахоўская

0
Крем / Адказаць
06.04.2013 / 15:46
о, у мяне акурат гара джынсаў ляжыць.. усё ніяк адпаведнага бамжа не падбяру... трэба неяк пасылачкай адправіць
0
віКніК / Адказаць
06.04.2013 / 16:37
добрыя людзі дай Бог ім здароўя
0
WK / Адказаць
06.04.2013 / 18:40
Welmi dobraia sprawa. Ad shcyraga sercu zhadaiu pospehu getym dobrym dziauchinam
Паказаць усе каментары/ 5 /
Каб пакінуць каментар, калі ласка, актывуйце JavaScript у наладах свайго браўзеру