Сустрэча праходзіла ў Палаце абшчын брытанскага парламента. Яе арганізатарам выступіла незалежнае брытанскае аб’яднанне Henry Jackson Society.
Як паведаміў БелаПАН адзін з удзельнікаў размовы, Саннікаў казаў аб парушэннях правоў чалавека ў Беларусі, становішчы зняволенага праваабаронцы Алеся Бяляцкага, атмасферы страху ў грамадстве і яго недаверы да ўлады.
«На жаль, пакуль незаўважна, што ўрад Вялікабрытаніі надае шмат увагі праблеме выканання правоў чалавека ў Беларусі, — сказаў беларускі палітык. — Мы не бачым, што на ўрадавым узроўні прызнаецца праблема існавання палітычных зняволеных у нашай краіне. Аднак я толькі што вывучыў даклад Міністэрства замежных спраў Вялікабрытаніі аб правах чалавека, у якім я шчаслівы быў убачыць радкі пра тое, што Злучанае Каралеўства працягне палітыку санкцый у дачыненні да беларускага рэжыму датуль, пакуль у краіне застаюцца палітзняволеныя».
Праваабаронца Вольга Захарава, у сваю чаргу, указала не недастатковую выніковасць уплыву Еўрасаюза на палітычную сітуацыю ў Беларусі. Яна звярнула ўвагу на гандаль беларускімі нафтапрадуктамі ў Еўропе. «Купляючы таннае паліва ў Беларусі, ЕС узмацняе яе эканамічную залежнасць ад Расіі, — мяркуе Захарава, — выручаныя ж грошы ідуць на ўмацаванне дыктатуры, а не на карысць насельніцтва».
Андрэй Саннікаў адказаў на пытанні ўдзельнікаў слуханняў аб сітуацыі ў Беларусі, магчымых шляхах яе развіцця, ролі Еўропы і Вялікабрытаніі ў руху беларускага грамадства да дэмакратычных каштоўнасцяў.
