09.05.2013 / 13:53

Гандбол. Галоўным трэнерам «Дынама» стане трэнер зборнай Славеніі

У новы гандбольны сезон мінскае «Дынама» ўступіць пад пачаткам кіраўніцтвам славенца Барыса Дэніча. Імя пераемніка Сяргея Бябешкі дынамаўскі менеджмент трымаў у таямніцы, але ў чацвер яго рассакрэцілі балканскія інтэрнэт-крыніцы.
Перамовы чэмпіёна Беларусі з вядомым славенскім спецыялістам ўжо завершаны. У сваю чаргу, Дэніч узгадніў з гандбольным саюзам Славеніі працу ў рэжыме сумяшчэння пасад галоўнага трэнера ў мінскім клубе і нацыянальнай камандзе Славеніі.

Як вядома, нядаўна Дэнічу працягнулі трэнерскія паўнамоцтвы ў зборнай Славеніі, якую ён вывеў на шостае месца ў Еўропе і чацвёртае ў свеце, да Алімпіяды-2016 у Рыа-дэ-Жанейра.

Нагадаем, што зборная Славеніі — канкурэнт беларускай каманды ў кваліфікацыйнай спрэчцы за пуцёўку ў фінал чэмпіянату Еўропы 2014 года. Вырашальны матч паміж імі пройдзе ў Любляне 16 чэрвеня.

Каб пакінуць каментар, калі ласка, актывуйце JavaScript у наладах свайго браўзеру