У пятніцу, 10 мая, палітык,экс-кандыдат у прэзідэнты на выбарах 2010 г. Алесь Міхалевіч абараніў у Варшаве доктарскую дысертацыю. Пра гэта ён паведаміў у сваім фэйсбуку.
«Абараніў доктарскую дысертацыю. Тэма — „Партыі і палітычныя рухі ў посткамуністычнай трансфармацыі. Прыклад Беларусі і Украіны 1989–1996“. Аналізаваў практычна ўсе посткамуністычныя краіны, з асаблівай увагай на Беларусь і Украіну. Абарона доўжылася дзве гадзіны і адбывалася ў памяшканні Collegium Civitas, на 12 паверсе Палаца культуры і навукі ў Варшаве. За наданне мне вучонага звання доктара навук камісія прагаласавала адзінагалосна. Сёння, у пятніцу, ж навуковая рада Інстытута палітычных даследванняў ПАН павінна зацвердзіць мяне ў званні доктара навук», — напісаў ён.
Алесь Міхалевіч быў кандыдатам у прэзідэнты на выбарах 2010 г. У ноч на 20 снежня 2010 г. арыштаваны, праходзіў як падазраваны па справе аб "масавых беспарадках". У лютым 2011 г. быў выпушчаны з СІЗА КДБ пад падпіску аб нявыездзе. Правёў прэс-канферэнцыю, на якой заявіў аб катаваннях у СІЗА КДБ.
Праз некалькі дзён тайна выехаў з Беларусі і папрасіў палітычнага прытулку ў Чэхіі.
