Як паведаміла агенцтва «Інтэрфакс», Следчы камітэт завёў крымінальную справу на былога кіраўніка Жыткавіч Мікалая Какору. Падазраецца экс-чыноўнік у выкарыстанні службовага палажэння для здзяйснння злачынстваў, скіраваных на атрыманне незаконнай страхавой выплаты ў сувязі з пашкоджаннем службовага аўто.
Спачатку мэра горада «сышлі» з пасады.
У адстаўку яго адправіў сам Лукашэнка. Прычына — «грубае парушэнне службовых абавязкаў і правіна, што не можа сумяшчацца са знаходжаннем на дзяржслужбе».
Вядома, што такія дзеянні нанеслі шкоду райвыканкаму і «Белдзяржстраху» ў асабліва буйным памеры (не менш за 100 мільёнаў рублёў). Нанесеную шкоду ён ужо выплаціў.
Мікалай Какора нарадзіўся ў 1967 у суседнім Петрыкаўскім раёне. Скончыў Гомельскі кааператыўны інстытут. Працаваў у райспажыўсаюзе. Служыў у групе савецкіх войскаў у Германіі. Ад 2005 да 2008 працаваў першым намеснікам мэра Калінкавічаў. Адметна, што мэрам тады быў Віктар Піліпец, які пазней заняў крэсла кіраўніка Гомеля, а летась быў арыштаваны. Какору падвысілі да старшыні Жыткавіцкага райвыканкама праз год пасля таго, як на павышэнне пайшоў былы шэф.
Райвыканкам Какора ўзначальваў амаль пяць гадоў. Жанаты, мае двух сыноў.
«Я — звычайны сельскі хлопец, з якога на сёння вырас старшыня райвыканкама, — адзначаў Какора ў адным з інтэрв’ю адразу пасля прызначэння. — У людзях я цаню прыстойнасць, шчырасць, дабрыню. Не трываю, натуральна, хлусні і падману. Як правіла, падмануць можна толькі раз, пасля гэта ўсё выяўляецца. Хацеў бы, каб усё-ткі ў людзях, якія вакол мяне, станоўчыя якасці пераважалі».
Хроніка апошніх арыштаў у мэрыях
Красавік 2013 — затрыманы намеснік мэра Барысава (падазраецца ў атрыманні хабару);
Люты 2013 — на 14 гадоў асуджаны нам. мэра Мінска Ігар Васільеў (атрыманне хабару);
Верасень 2012 — арыштаваны экс-мэр Гомеля Віктар Піліпец (абвінавачваецца ў перавышэнні ўлады);
Лета 2012 — нам. мэра Узды Міхаіл Крукоўскі абвінавачаны ў крадзяжы, пазней справу спынілі;
Май 2012 — арыштаваны экс-мэр Полацка Уладзімір Тачыла (злоўжыванне ўладай), пазней памілаваны.
