Валер Булгакаў вярнуўся ў краіну, часопіс «Arche» аднаўляе выхад
Мінінфармацыі зрабіла падарунак да 15-годдзя выдання.
«Мы атрымалі дакументы аб перарэгістрацыі сёння раніцай», — паведаміў выканаўца абавязкаў галоўнага рэдактара кандыдат гістарычных навук Алесь Пашкевіч.Ён замяніў на пасадзе Валера Булгакава, калі над апошнім летась навісла пагроза крымінальнай справы. Раней часопісу чатыры разы адмаўлялі ў перарэгістрацыі.
«Галоўным рэдактарам ізноў будзе Валер Булгакаў, я — намеснікам», — адзначыў Пашкевіч.
Новы нумар часопіса будзе адпраўлены ў друк неадкладна. Ён будзе прысвечаны гісторыі Другой сусветнай вайны. «Arche» не выходзіў ад чэрвеня 2012 года, і да пачатку лета абавязкова мусіць з’явіцца чарговы выпуск.
«Нумары гэты час мы рыхтавалі і зараз яны будуць друкавацца паспешным парадкам. Цяпер важна аднавіць ранейшую штомесячную перыядычнасць. Будзем старацца вярнуцца ў падпісныя каталогі», — сказаў Пашкевіч.
Сёлета, дарэчы, часопіс адзначыць 15-годдзе.
У верасні галоўны рэдактар «Arche» Валер Булгакаў быў затрыманы ў Гродне на прэзентацыі кнігі Яна Шумскага «Саветызацыя Заходняй Беларусі». Яго абвінавацілі ў незаконнай прадпрымальніцкай дзейнасці. У друкарні, дзе выходзіў часопіс, упраўленне Дэпартамента фінансавых расследаванняў правяло праверку. Булгакава аштрафавалі на 500 тысяч рублёў. Асцерагаючыся яшчэ і крымінальнага пераследу, ён пакінуў Беларусь.
Аказалася, што нічога крымінальнага няма, 22 сакавіка стала вядома, што ніякай справы супраць «Arche» заведзена не было. У сярэдзіне красавіка Булгакаў вярнуўся ў краіну. Але па-ранейшаму пад арыштам знаходзяцца 5000 кніжак, канфіскаваных у яго восенню.
Цяпер чытаюць
«Дзеці растуць з адчуваннем, што быць беларусам пачэсна, як выпускніком Гарварда». У Батумі дзейнічае беларускамоўная школа — вось як гэта працуе2
«Дзеці растуць з адчуваннем, што быць беларусам пачэсна, як выпускніком Гарварда». У Батумі дзейнічае беларускамоўная школа — вось як гэта працуе
«Калі Расія нападзе на NATO, Калінінград будзе знішчаны ў першыя ж гадзіны. Але могуць прайсці два тыдні, перш чым дадатковыя сілы прыбудуць у Літву» — генерал Бэн Ходжэс2121
Каментары