26.05.2013 / 14:51

Начная пагоня па Мінску: маладыя злодзеі адбіваліся ад машыны ДАІ магнітолай

Двое хлопцаў у Мінску на скрадзенай машыне зладзілі начныя ўцёкі ад ДАІ, расказала старшы інспектар па агітацыі і прапагандзе АДАІ Фрунзенскага раёна Мінска Алена Волчак.

Сёння ноччу каля 3 гадзін 10 хвілін экіпаж ДАІ, які дзяжурыў у раёне вуліц Гарэцкага і Рафіева, звярнуў увагу на аўтамабіль ВАЗ 21061, які паводзіў сябе дзіўна: то разганяўся, то тармазіў.
Кіроўца, заўважыўшы машыну ДАІ, заехаў на стаянку гіпермаркета. Экіпаж накіраваўся ўслед за парушальнікамі.
Але як толькі супрацоўнікі ДАІ пад’ехалі да іх, ВАЗ рэзка сарваўся з месца.

Інспектары неаднаразова звярталіся да кіроўцы праз гучнаўзмацняльнік з патрабаваннем спыніцца, але ніякага толку. Пагоня панеслася па вуліцах Гарэцкага, Шаранговіча, Лабанка, Сухараўскай, хлопцы спрабавалі схавацца на МКАД,

уцекачы пятлялі па начным горадзе, не звяртаючы ніякай увагі на правілы дарожнага руху, хуткасны рэжым, святлафоры і дарожную разметку.
Інспектары выклікалі дапамогу.
Убачыўшы, што іх даганяюць ўжо дзве машыны ДАІ, кіроўца і пасажыр ВАЗа сталі на хаду кідаць у аўтамабілі інспектараў рэчы і прадметы з сваёй машыны. Аўтамагнітола трапіла ў лабавое шкло аднаго з экіпажаў, прайшла па датычнай, але, на шчасце, не прабіла яго.
Збочваючы з вуліцы Панамарэнкі на праспект Пушкіна, кіроўца ВАЗ не ўтрымаў машыну,
на вялікай хуткасці тая пайшла ў занос, наехала на бардзюрны камень, наляцела на асвятляльную мачту і перакулілася.
Інспектары затрымалі кіроўцу і пасажыра, яны абышліся ўдарамі.
Як высветлілася, хлопец правоў не меў (ён іх ніколі і не атрымліваў!) Больш за тое, машына была крадзенай. Гаспадыня ўжо напісала заяву.

Кіроўцу (жыхар Мазыра 1994 года нараджэння) і пасажыра (мінчанін 1992 года нараджэння) даставілі ў Маскоўскае РУУС сталіцы для далейшых разбіральніцтваў. На кіроўцу складзена 7 адміністрацыйных пратаколаў за розныя парушэнні.

Каб пакінуць каментар, калі ласка, актывуйце JavaScript у наладах свайго браўзеру