У працоўным кодэксе пашыраць катэгорыі асоб, якія маюць права на дэкрэтны адпачынак замест маці

У Беларусі плануецца пашырыць спектр паслуг для сямей з дзецьмі, паведаміла міністр працы і сацыяльнай абароны Беларусі Мар’яна Шчоткіна 31 мая на Міжнароднай навукова-практычнай канферэнцыі «Сям’я ў кантэксце дэмаграфічных і гендарных праблем сучаснага грамадства».

Паводле слоў Шчоткінай, у адпаведнасці з новай рэдакцыяй закона «Аб сацыяльным абслугоўванні» ў Беларусі плануецца развіваць праграмы сацыяльнага абслугоўвання сям’і, дзейнасць службаў па аказанні дапамогі бацькам у выхаванні дзяцей. На сёння ў Беларусі працуюць 149 тэрытарыяльных цэнтраў сацыяльнага абслугоўвання і два цэнтры сацыяльнага абслугоўвання сям’і і дзяцей. Спектр паслуг, якія яны аказваюць як на бясплатнай, так і на часткова платнай і платнай аснове, будзе пашырацца, сказала міністр.

Так, паводле яе слоў, няпоўным сем’ям, якія выхоўваюць дзіця-інваліда, і сем’ям, якія выхоўваюць трох і больш дзяцей, будуць бясплатнымі кароткачасовыя паслугі нянькі. На базе стацыянарных устаноў сістэмы Мінпрацы і сацабароны даступная паслуга сацыяльнай перадышкі — вызваленне бацькоў ад догляду дзіцяці-інваліда на некаторы час. Бацькі змогуць скарыстацца гэтай паслугай на перыяд адпачынку ці на час догляду сваіх састарэлых бацькоў, на вырашэнне сямейных пытанняў і г.д.

Паводле слоў Шчоткінай, уносяцца таксама змяненні ў працоўны кодэкс РБ у частцы пашырэння катэгорый асоб, якія маюць права на адпачынак па догляду дзіцяці замест маці. Такое права будзе дадзена бацькам і іншым сваякам дзіцяці, калі маці з’яўляецца самазанятай — працуе адвакатам, індывідуальным прадпрымальнікам, рамеснікам і да т.п.

Анастасія Салановіч, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ