Сімпсаны ў кіно (The Simpsons Movie)
ЗША, 2007, каляровы, 87 хв.
Рэжысэр: Дэвід Сілвэрман
Жанр: Анімацыйная камэдыя для ўсёй сям’і
Адзнака: 7,5 (з 10)
Пасьля таго, як Гамэр Сімпсан выклікаў экалягічную катастрофу, а прыдуркаваты прэзыдэнт (Шварцнэгер) вырашыў зьнішчыць Спрынгфілд, шальная сямейка выратоўвае ўласны горад...
Праз 20 гадоў пасьля тэлевізійнага дэбюту жоўтагаловыя Сімпсаны зьявіліся на кінаэкране. І ў адрозьненьні ад Чалавекаў-павукоў, трансформэраў – і другіх маляваных пэнсіянэраў – не падкачалі.
Пэрсанажы папулярнага мульта выклікаюць рогат да колікаў, мітусяцца, спрачаюцца, трапляюць у самыя ідыёцкія сытуацыі – і радуюцца жыцьцю. Захавана пацешная атмасфэра арыгіналу, гарадок Спрынгфілд, як на далоні, а ў кожнага пэрсанажа – каронныя сольныя нумары.
Поўнамэтражная стужка Дэвіда Сілвэрмана, нязьменнага “летапісца” Сімпсанаў, будзе цікавая й гледачам, якія ніколі ня чулі пра вірлавокую сямейку сымпатычных балбесаў.
Гамэр сьвінячыць, сынок Барт… напіваецца – і аголеным катаецца на скэйце пад тарантынаўскія матывы (?!), дачка Ліза рамантычна кахае й захапляецца экалёгіяй, а немаўля Мэгі, зь нязьменнай соскай, у рукапашным баі даст фору любому хулігану.
Стваральнікі Сімпсанаў вырашылі дасьціпна пакпіць і над кінаклясыкай. “Ахвярамі” сталіся “Беласьнежка”, “Бэмбі”, знакаміты кадар з Мэрылін Манро, паўтораны Мардж, а пра жывых галівудзкіх зорак і гаварыць не выпадае.
Бадзёры Том Хэнкс (агучаны Томам Хэнксам) радасна распавядае пра пэрспэктывы ядзернага зьнішчэньня Спрынгфілда. А вось Шварцнэгера не рызыкнулі папрасіць агучыць сябе самога. Гэта не перашкодзіла ягонаму анімацыйнаму двайніку заставацца вельмі пацешным.
На пачатку карціны Гамэр Сімпсан заяўляе, што ня варта ёлупням глядзець фільм у кіно, калі яго можна ўбачыць на тэлевізіі. Гэта ён дарэмна.
Паглядзіце на экране на сямейку Сімпсанаў – і парадуйцеся за сваю.
