Фатограф «НН» Сяргей Гудзілін атрымаў аж шэсць прэмій «Прэс-фота-2013» 13
Журы беларускага конкурсу «Прэс-фота-2013» адзначыла першым месцам у намінацыі «Навіны» эксперыментальны здымак Сяргея Гудзіліна.
На ім — журналіст газеты «Комсомольская правда в Белоруссии» Ірына Козлік (злева) і фатограф-фрылансар Юлія Дарашкевіч чакаюць суда ў машыне міліцыі. Суддзя суда Савецкага раёна горада Мінска Дзмітрый Паўлючэнка аштрафаваў журналістак на 3 млн. беларускіх рублёў (каля $360) кожную. У адміністратыўных пратаколах, складзеных у дачыненні да журналістак, было напісана, што затрыманыя абвінавачваюцца ў «пікетаванні шляхам фатаграфавання» з плюшавым мядзведзем і надпісам «No pictures — no problems?». Таксама першае месца ў Гудзіліна ў намінацыях «Рэпартажны партрэт» — за серыю «Чорны спіс мастацтваў» і «Мабілаграфія» — за фота з беларускага «Поля цудаў», што ля рынку «Ждановічы». У той самай намінацыі адзначаная серыя Гудзіліна «Супрэматычны Мінск», прысвечаная вулічным мастакам і тым, хто з імі змагаецца.
У намінацыі «Пастановачны партрэт (серыі)» адзначаныя фота жодзінскіх выпускніц, серыя «Артадаксальныя выбары», прысвечаны рытуалу народнага волевыяўлення, трапіла ў намінацыю «Мастацтва ды забавы».