Больш за пяць гадзін спатрэбілася сілам Дзяржаўнай пажарна-выратавальнай службы (ДПВС) Латвіі, каб ліквідаваць пажар павышанай ступені небяспекі ў Рыжскім замку. Агонь знішчыў 3200 квадратных метраў.
Як адзначыла прадстаўнік прэс-цэнтра ДПВС Вікторыя Шэмбеле, пажар, які пачаўся ў 22:29, быў лакалізаваны ў 03.53. Аднак ратавальнікі да гэтага часу працягваюць працы ў будынку.
Больш за ўсё ў выніку пажару пацярпеў дах замка, яго канструкцыя і гарышча (згарэла 2 400 квадратных метраў), верхні паверх корпуса (600 квадратных метраў) і трэці паверх (200 квадратных метраў).
Ужо ў 04.45 адноўлены рух па Набярэжнай 11 лістапада паміж Вантавым і Каменным мастамі.
У ДПВС таксама паведамілі, што ў ходзе тушэння пажару адзін з ратавальнікаў атруціўся прадуктамі гарэння. Па словах Шэмбеле, пасля аказання медыцынскай дапамогі пажарны быў выпісаны з бальніцы.
* * *
У чацвер вечарам у сталіцы Латвіі спалахнуў пажар у Рыжскім замку, які закрыты на рэканструкцыю. Дах будынка гарыць адкрытым полымем.
Паведамленне пра ўзгаранне даху прэзідэнцкага замка паступіла на пульт дзяжурнага ў 22.21.
Паколькі будынак знаходзіцца ў цэнтры горада побач з іншымі жылымі дамамі і важнымі пабудовамі, пажару была прысвоена найвышэйшая ступень небяспекі і на месца надзвычайнага здарэння накіравалі больш за 10 машын пажарных.
Спачатку плошча пажару складала 50-100 метраў, але полымя хутка распаўсюдзілася па ўсім даху.
Неўзабаве на тушэнне пажару былі мабілізаваны ўсе сілы Дзяржаўнай пажарнай службы Рыжскага рэгіёна, а таксама прыцягнуты верталёт Нацыянальных узброеных сіл і буксір Рыжскага свабоднага порта.
Прычыны ўзгарання пакуль невядомыя.ДПС таксама пакуль не можа прагназаваць, колькі часу спатрэбіцца для ліквідацыі пажару. Каля 23.30 пажарныя адправіліся ўнутр будынка.
* * *
Гісторыя Рыжскага замка ўзыходзіць да 1330 г.,калі яго будаўніцтва задумалі выцесненыя за тагачасныя межы горада лівонскія рыцары. Пасля замак неаднаразова разбураўся і перабудоўваўся.
Да пачатку 1990-х гадоў тут размяшчаўся Палац піянераў. Пасля ліквідацыі піянераў, як арганізацыі, замак некаторы час пуставаў, пакуль у 1995 годзе не пачаў выконваць функцыі рэзідэнцыі кіраўніка Латвіі.
Замак цяпер знаходзіцца на рэканструкцыі, прэзідэнт Андрыс Берзіньш знаходзіцца ў часовай рэзідэнцыі ў Доме Чарнагаловых.
