У Рэдакцыю «НН» звярнуўся чытач, які паведаміў, што вёску Беліца Лідскага раёна ўчора ачапілі супрацоўнікі сілавых ведамстваў. Прычына — чума свіней.«Мая дзяўчына з гэтай вёскі. Казала, што адной з жанчын здохла свіння. Яна звярнулася ў ветслужбы. Учора вёску ачапілі міліцыянеры, АМАПаўцы. Забіралі свіней на забой. Нібыта за цану 16 тысяч за кілаграм. Людзі ў паніцы былі. Сёння дзяўчына выязджала з Беліцы, дык у яе ператрэслі сумку, каб не было мяса», — расказаў чытач.
Каб праясніць інфармацыю тэлефануем у Беліцкі сельсавет. Старшыня Віктар Пастэрнак не вельмі настроены размаўляць: «Тэлефануйце ў ветстанцыю. Я ж не ведаю чума гэта ці не чума».
«НН»: Кажуць, што вёску ачапіла міліцыя? Сумкі правяраюць.
ВП: Не кажыце глупстваў. Стаяць людзі на прыпынку, ніхто нічога не правярае.
«НН»: Людзі маняць?
ВП: Здараецца, што і маняць. Я гэтым зусім не цікаўлюся.
«НН»: Імаверная чума свіней сельсавет не цікавіць?
ВП:
Ну, калі «ўказюку» зверху дадуць, тады цікавіць.
У ветэрынарнай станцыі Лідскага раёна «НН» пацвердзілі, што ў вёсцы Беліца сапраўды быў зафіксаваны ачаг афрыканскай чумы свіней.
«Так, было, але ачаг ужо ліквідаваны», — паведамілі там. Маштабы і падрабязнасці паведамляць адмовіліся.
