 |
Тэракты 11 верасьня 2001 году па‑ранейшаму жывыя ў памяці пераважнай большасьці грамадзянаў ЗША. 81% амэрыканцаў называюць гэтую падзею самай глыбокай па ўзьдзеяньні ў іх жыцьці.
Пра гэта сьведчаць апублікаваныя ў Вашынгтоне зьвесткі апытаньня грамадзкае думкі, прымеркаванага да шостай гадавіны трагедыі.
91% амэрыканцаў упэўненыя, што ЗША зноў пацерпяць ад удару тэрарыстаў на сваёй тэрыторыі ў будучыні, 47% чакаюць такога ўдару цягам пяці гадоў.
На сёньняшні дзень ужо 16% амэрыканцаў пабывалі на месцы падзеньня «вежаў‑блізьнят» Сусьветнага гандлёвага цэнтру ў Нью‑Ёрку, каб асабіста ўшанаваць памаць загінулых.
У ЗША сёньня пройдуць жалобныя акцыі, а ў той момант, калі першы самалёт урэзаўся ў вежу Сусьветнага гандлёвага цэнтру, у ЗША пачнецца хвіліна маўчаньня.
