Зміцер Дашкевіч сыходзіць з «Маладога фронту» 19

Зміцер Дашкевіч, лідар зарэгістраванага ў Чэхіі «Маладога фронту», плануе выйсці з гэтай міжнароднай арганізацыі. Такую заяву ён зрабіў 2 верасня падчас анлайн-канферэнцыі на сайце Naviny.by («Беларускія навіны»).

У каментары БелаПАН, палітык растлумачыў гэта рашэнне, у першую чаргу, сваім узростам: «Мне 32 гады, і калі ты прыходзіш у арганізацыю, дзе палове людзей 16 гадоў, вы думаеце рознымі катэгорыямі».

Зміцер Дашкевіч перакананы, што яму знойдзецца дастойная замена. «Маладым фронтам» будуць кіраваць ўжо новыя лідары — больш перспектыўныя, больш крэатыўныя, якія, я перакананы, і прывядуць яго да нашай агульнай перамогі», — сказаў палітык.

Ці пакіне арганізацыю яго жонка Анастасія Дашкевіч (Палажанка), якая зараз з’яўляецца намеснікам старшыні «Маладога фронту», Дзмітрый пакуль не ведае.

Падчас анлайн-канферэнцыі Дашкевіч неаднаразова заяўляў пра сваю падтрымку Паўла Севярынца, сустаршыні аргкамітэта па стварэнні партыі «Беларуская хрысціянская дэмакратыя» (БХД), які быў асуджаны па крымінальнай справе аб масавых беспарадках у Мінску 19 снежня 2010 і зараз адбывае пакаранне ў спэцкамендатуры № 7 у Пружанскім раёне Брэсцкай вобласці.

«Калі Павел Севярынец прыме рашэнне балатавацца на пасаду прэзідэнта Рэспублікі Беларусь, я буду капаць за яго днём і ноччу, і я ведаю, што будуць капаць тысячы людзей, бясплатна і самааддана», — сказаў Дашкевіч крыху пазней у каментары БелаПАН.

БХД блізкая Дашкевічу па поглядах. «Але я пакуль не хачу далучацца ні да адной палітычнай структуры ці ствараць сваю», — падкрэсліў ён.

Пры гэтым Зміцер Дашкевіч мае намер працягваць грамадска-палітычную дзейнасць, формы якой вызначыць ў бліжэйшы час. «Я магу данесці сваё слова тое, чым я жыву, больш эфектыўна іншымі сродкамі», — адзначыў ён.

У бліжэйшай будучыні Дашкевіч збіраецца сістэматызаваць напісанае ім у турме. «І, калі Бог дасць мудрасці і сіл, напісаць што-небудзь больш сур’ёзнае, паступова выдаючы гэта», — распавёў палітык пра свае планы.

Зміцер Дашкевіч таксама плануе ў бліжэйшы час пайсці на біржу працы Заводскага раёна, у якім ён зарэгістраваны. «Я папрашу ўладкаваць мяне на працу па маёй адукацыі — настаўнікам мовы і літаратуры», — сказаў ён.

Зрэшты, Дашкевіч сумняваецца ў тым, што знойдзе такую працу: «Таму ўжо зараз шукаю магчымасць незалежнага заробку праз сціплую літаратурную працу, якой прысвячу бліжэйшыя паўгода-год», — сказаў ён.

32- гадовы Зміцер Дашкевіч вызваліўся з гарадзенскай турмы № 1 28 жніўня. Ён правёў у зняволенні 986 дзён па абвінавачванні ў «асабліва злосным хуліганстве».

Арцём Шрайбман , БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ