Падрыхтавацца да атрымання «карты паляка» можна прыкладна за тыя ж грошы і час, што і да атрымання правоў на кіраванне аўтамабілем.
У адну са школ званю пад выглядам кліента. Сказаць, што з польскімі каранямі ў мяне праблема і нават не ведаю, як выглядае сцяг заходняй суседкі, не паспяваю — мне адразу расказваюць падрабязнасці пра расклад курсаў і іх кошт.
«Курс працягваецца тры месяцы, заняткі тройчы на тыдзень, па 90 хвілін.
Выкладчык рыхтуе па ўсім — па вуснай мове, па сумоўі — прапрацоўваюцца адказы на ўсе пытанні па карце паляка. Каштуе праграма 2 мільёны 400 тысяч».
Жадаючых шмат, таму малады дзявочы голас з іншага боку слухаўкі раіць мне паспяшацца.
Пытанне пра адносна высокі кошт курсаў (год таму прыкладна столькі ж я заплаціў за цэлы год заняткаў англійскай мовай) застаецца без адказу. Затое мяне запэўніваюць, што станоўчы вынік амаль гарантаваны.
«Большасць атрымлівае карты. З таго, што мы ведаем, прынамсі.
Пасля нашага курса ёсць неабходныя навыкі. Моўныя ў тым ліку — без гэтага не пройдзеш. Дакументаў мы ніякіх не патрабуем — гэта толькі пасольства».
Мінчанка Соф’я на курсы палякаў не хадзіла — з каранямі ў яе ўсё як трэба, мову вывучыла самастойна. Таму карту паляка атрымала без праблем. Але, яна расказвае, што на сумоўі ў амбасадзе была хутчэй выключэннем. Большасць жадаючых атрымаць «карту паляка» беларусаў нават не ведаюць, хто такі Ян Павел ІІ.
«Я была ў шоку ад таго, што толькі чалавек дзесяць з трыццаці былі неяк падрыхтаваныя. Рэшта нават не ведала, хто такі Ян Павел ІІ».
Соф’я гаворыць, што палякаў з беларусаў робяць не ў адной толькі моўнай школе. Аказваецца, такі бізнэс у Мінску набірае абароты!
«Знаёмы хлопец польскай мовы не ведаў зусім. Нуль. Запісаўся на курсы: тры месяцы двойчы на тыдзень. Дык там насамрэч мэтанакіравана вядуць да атрымання карты паляка. Пасля гэтых курсаў ён крок улева, крок управа — ні слова не мог сказаць
Тым часам па звестках на пачатак года, Польшча выдала ўжо сто тысяч карт паляка. 42 тысячы з іх атрымалі грамадзяне Беларусі.
