29.09.2013 / 23:10

Беларусы аднавілі Еўфрасіннеўскі крыж у Канадзе — фотафакт 4

У суботу, 28 верасня, беларусы Канады сабраліся ў сакральным месцы — Прошчы Пакутнікаў (Martyrs' Shrine) каля горада Мідлэнд (штат Антарыа), каб аднавіць Беларускі Еўфрасіннеўскі Крыж.

Крыж быў упершыню пастаўлены ў гэтым традыцыйным месцы паломніцтва прадстаўнікамі беларускай дыяспары з усяго свету ў 1988 г. у памяць 1000-годдзя хрысціянства ў Беларусі.

Арганізатарамі і галоўнымі фундатарамі таго праекта былі Вінцук і Раіса Жук-Грышкевічы, на ўрачыстае адкрыццё Крыжа прыязджала Наталля Арсеннева, якая прысвяціла яму адзін з сваіх вядомых вершаў.

Сёлета Крыж давялося дэмантаваць, бо за 25 гадоў драўніна, з якой ён быў зроблены, спарахнела дарэшты.

Дзякуючы ахвяраванням беларускай грамады Канады, Амерыкі і Беларусі і працы рук Юркі Шаўчэнкі, на свята Узвіжання паўстаў новы чатырохметровы Крыж. Падчас урачыстай службы Крыж асвяціў епіскап Беларускай аўтакефальнай праваслаўнай царквы Уладыка Святаслаў.

Напрыканцы службы беларусы Канады праспявалі традыцыйны гімн «Магутны Божа».

Крыж увасабляе надзею беларускай грамады на вызваленне і адраджэнне вольнай Бацькаўшчыны, што, на жаль, не страціла актуальнасці і сёння.

Першы Крыж быў пастаўлены пакаленнем паваенных эмігрантаў, сёння новае пакаленне беларусаў Канады пацвердзіла сваю адданасць справе Беларушчыны.

Прэс-служба ЗБК

0
VM / Адказаць
30.09.2013 / 09:33
Быў у Канадзе ў 1990-м, езьдзілі ў госьці да Раісы Жук-Грышкевіч у Бэры (праз год пасьля сьмерці ейнага мужа, прэзідэнта БНР), атрымаў у падарунак калярытныя паштоўкі гэтага крыжа, тады ён яшчэ быў новенькі. Шчасьце, што ёсць каму падтрымліваць належны стан беларускіх рэліквіяў хоць у Канадзе, калі ня тут.
0
Петрыковец / Адказаць
30.09.2013 / 10:53
Дай Бог, каб іх дзеці, памяталі, што яны - беларусы.
0
Step / Адказаць
30.09.2013 / 13:18
Дай Бог, каб дома дзеці ведалі, што яны не м...калі. Таму ўсё на канцэрт культавага гурта ":Б:Н:" 13 кастрычніка ў клюб "Re:Public" http://belmusic.org/news/novysinglebn.html
Паказаць усе каментары/ 4 /
Каб пакінуць каментар, калі ласка, актывуйце JavaScript у наладах свайго браўзеру